Misson mapa atema chiyongtsü kaket ka saya

Rev. I. Lanu Jamir (achijilen nungi pezübuba)-i züluba ‘Mission Feeds’ kaket sayatsür Rev.Andrew (achijilen nungi pongobuba) den Tsüngrem tenzükertem kar noksa nung angur. Dimapur, Aug.16, 2017.

Dimapur, Aug.16 (TYO) : Tanü Bodbar nü Nagaland Missions Movement (NMM) pur mapa inyakba kidang Dimapur nung Rev.I.Lanu Jamiri English nung züluba kaket ka tenüng agi “Mission Feeds’ kaket NMM Director, Rev.Andrew Semp-i sayatsüogo.

Tanü iba kaket sayatsüba sarasadem sentong tatsüka agidang, ‘iba ama sama aliba tanülatem anir aruba mapa inyakertem teyari angutsüsa kaket ka zülutetbaji NMM asoshia takok otsü ka asütsü, kechiyong kaket zülur ya NMM nisung lir,” ta NMM Director-i kaket zülur tenüng sanga metetdaktsü.

Iba ama mission mapa indang züluba jagi kaket züluri Tsüngrem mapa inyaktsü jangraba temulungjang sayur, ta Rev.Andrewisa metetdaktsü.

Iba kaket indang o ka ashidang, ‘taoba küm semer Tsüngremer tenyaba mapa tesem balala nung kin balala den inyaka aruogo, ajisüaka ni kodanga mission indang kaket zülutsübo bilema mali asü. Ajisüaka, kenü ozü kidangi kaket ayoker ka aru aser ni pa dang mission mapa indang kaket kabo lir mali’ ta asüngdangdang, pai kodanga mission kaket meyokdang ta langzü.

Iba nungji aoksar, nie iba kaket zülutsü tenzük, kechiyong mission mapa inyaker aser inyaknertem asoshi iba ama kaket ya kabosa akatsüla ta Tsüngremi kü mulungjang nung jembi,” ta Rev.I.Lanu Jamiri metetdaktsü.

Iba kaket zülutsü atema pai küm tenet agia züluogo ta paisa shisem.

Rev.I.Lanu Jamir ya Asangma nunger aser pa aser par kibong ya 1987 küm nungi 2000 küm tashi Orissa (tangbo Odisha ta ajar) nung Keonjhar ta ajaba tesem ka nung NMM tenüng nung Mission mapa inyaka liasü. Iba sülen 2001 küm nungi NMM nungsa Mission Promoter mapa inyaka liasü.

Tang pa ya Asangma Baptist Arogo kübok Touring Missionary mapa inyaker. Pa NMM nung alidang nungi tang tashi Dongdong Mission Asangma teloki senotsü nung yaria nungiter.

Pai züluba ‘Mission Feeds’ kaket ya  sen 250 agi Khristan kaket ayokdak aser kaket ayokertem ket nungi angutsü.