Mita alitsüba mapang

Külen Assam nung Bangladesh nungertem temelaba magii aita amongba puteta meyipa yoktsü renemer aser ano külen Manipur nungbo Myanmar nungi aruba Rohingya muslim nunger dena tonga aruba putetba mapa ya Nagaland asoshi arsangoktsüba mapang ka asütsü. Tang ano talisa Assam nung National Register of Citizens inyakyim ajanga sensopur jangjashiba ajanga senso masü ser jenoka aliba purtem temulung animesüngzükteti lir. Item ajakji Bangladesh nungi aruba nübortem dang asünungji, parnokji Assam toktsür par lima Bangladesh-i meyipa aotsü asü mesüra tanga state bushia oa jenoktsü ta asüba nung mesüngjemteti lir. Ano yaküm küm Myanmar nung Rohingya nung alir Muslim nunger ajak aridokba mapang parnok teimbaka Bangladesh nung jenok aser yang nung jagi parnok aika India-i arua jenoka lir. Item purtemji talidak maka tesem balala nung mapa bushia senzüdagi. Item bendangertem senzüsenpongbaji meteta Northeast state-tem rongnung talisa Assam aser Manipur ama nung government-i dang masü saka nübortemi kanga saksalema mita atar. Atangji, bendangertem arua memongtettsüsa Assam aser Manipur na dang nungibo Nagaland-ang temzüng ozüng agi jenjang balaka nung wazüka yuja lir. Ajisüaka, ashiko Nagaland nungang Bangladesh aser Rohingya nungi arur bendangertemji teimba jenoka alitsüa akok, kechiyong asenokiang ILP amshiba tajangzük mezüngshir aser ano asenokiang bendangertem jaoka mapa inyakdaktsür. Item bendangertemji alima repranga kazüa senzür raliwalirtem ama marur saka parnokji kasa sensosangertem ayangdak bushia senzür ama mapa bushia dang arur. Parnok asoshi mapa inyaktsü ngura teperi. Iba jagi parnok nem talidak aser chiyongtsü agütsütsü. Parnok jagi mapa mashishir. Ano külen asenok Nagaland nung alirtem nüngdakbaji mapa inyaker nüngdaker. Asenok tangar ama takar masütsüa akok saka asenok aika ket nung tang nüngdak peritsüsabo sen lir, kechiyong asenok aika ita sen achir aser ano aika tanga mapa inyakba nungi sen melamelaa angur. Anungji, asenoki mapa temerang meinyakner, iba jagi kisüjensü aser alu mapa dang masü saka kidang tanur reprangtsü dena tangar bendangertem nem nungloka toktsür. Iba jagi asenoki kisüjensü aser alu mapa inyaktsü memeteti akümba dang masü saka kidang soruchioktsü, ki aoktsü, süoshi shidoktsü aser tanur reprangtsüba mapatem dena mashi aser meinyaktet kümogo. Tangar tashitemetetter lima nungbo chuba aser chubatsürtemi anir mapa temerang inyaka tongpang nung tashi nokdaker saka asenokbo tangar kidang kilitsüa metemsüba nübortem süaka pei kidang peisasa süngo marok ka yanglua mejemtettsüsa kümer asükümtepa alir. Ibaji asenok asoshi kanga lendong lir. Iba amaji lia ajungbena bendangertemi asenok lima atsüngsepdagi aser meilongi tanü asen aliba kiojen dena parnoki agiadoktsü. Pei tetsü tasolima bendangertem ket nungi kümzüka ayutsü asoshi senso ajaki pei tata shilembo inyaktsüla. Bendanger ket nungi pei limabo kümzüka yuner saka pei chiyongtsü renemtsü asoshi dena temeyonga mekürakner ta süra asenoki asen lima aser asen taküm bendanger ket nungi kümzüka meyutettsü. Asen kidang soruchiokba nungi asen ki yangluba aser asen lu yimtsüba mapatem tashi bendangertem nem inyakdaktsü tashi asenoki Bangladesh aser Rohingya nungi aruba nübortemji meyipa meyoknütsü. Assam aser Manipur nungbo itemji mita alir aser pur meyipa yoker saka Nagaland nungbo asenokiang jaoka ngajadaktsür. Joko, asenok aika Aliba, Husseinba aser Abdulba mali melitettsüsa kümogo. Ibaji asenok aser asen chirnur aser semchirsemnurtem asoshi kanga shisabolutsü tulu lir. Tarutsü asen lima aser chirnurtem asoshi tang asenoki bendangertem anioka kiojen yangludaktsüba aser mapa inyakdaktsübatem ya asen chirnurtem agitsü inyaktsür masü saka parnok ashioktsür asütsü. Atangji, asenoki meinyaktetba mapa aika nung tangar teyari agitsüsa adoker, anungji agitsüla saka kodang tangar teyari medeni asenok taküm alitsü mekoki kümdir, asenok limaji asen meyong masü saka bendanger meyong kümogo ta angatetdi. Asen lima bendanger ket nungi kümzüktsü asoshi ILP ozüng aliba kija agi makoktsü saka asenoki bendanger teyari magii asenoksasa litetba lima aser lokti ka küma yanglutettsüsa asenoki inyaktsüla aser asen chirnurtem anitettsüla.