Mithun Chakraborty taruba ita nungi mapa nung amtaktsü

December 22, 2015: Nüngtugu Bollywood film actor tejen, Mithun Chakraborty ya tang teperem angoba atema ‘physiotherapy’ tagidak lir, ajisüaka taruba ita nungibo pa mapa tenzüktsü, ta par jabaso Mahaakshay-i ashi.

Arishi küm 65 tain ya joko mapang tatsüka teperem agi timtema kazür.

“Kübo tangbo anema kümdar. Pa tang tajungba lir. Tangbo pa noklang nung shilem 80 agi tajungba kümogo. Pa tang-a physiotherapy agidar. Pa iba timtem yagi tesüiba ita ana asem tashi okronga aruogo. Doctor temi pa dang yipten ung anisüngtsü tetuyuba agütsü aser taruba ita nungiang mapa nung amtaktsü shir liasü,” ta Mahaakshay-i IANS dang ashi.

“Pa dang kidang lir saka yipten nung zükdaka shirangerbo masü. Pa kidang jajazüa pai metsüba ozü nem chiyungtsü agüjasa amunger. Pa 2016 January tom ka nungibo project nung amtaka inyak tenzüktsü atema bendang linükleni aotsü,” ta paisa shisem.