Bakassi, July 17 (Agencies): Cameroon mitkartem indang rong ka Deobarnü mükepokba nung nisung 30 dak tali samar bushir, ta linük tir indang office ajanga sangdong.
Rapid Intervention Brigade mitkartem indang khu belenba rong, koba ajanga Nigeria nung aliba Boko Haram telungpurtem den raradang yaria liasü, iba rong nung nisung 37 mener lia Deobar anepdang mükepok,” ta Cameroon tir indang office ajanga sangdong nung ashi.
Iba rong mükepokba lendong nungi mitkar asem kümzüka lir saka passenger 34 mangu bushidar, ta sangdong nung shisema lir.
Bakassi tzüküm nung mitkartem atema kiojen yanglutsü asoshi oset balala iba rong nung bena liasü, ta ashir.
Debunsha yimtsüng anasa tzüküm nung iba rong mükepokba ya tzüsem tesashi aliba ajanga südi, ta ketdangsertemi bilemer saka kuli tejangja metettsü asohi bushisüngdang südagi.
Boko Haram telok makdoktsü asoshi Cameroon nungi mitkar meyerijang aika Far North tesemi yok. Item telok ajanga Lake Chad tesem nung nisung 20,000 dak tali tepset aser million 2.7 dak tali pei talidak tesem doktsür jena aotsüsa aküm.
Boko Haram telungpurtemi Cameroon nung lendong aiben agüja arur. Taoba ita nunga pei talidak tesem doktsür arua adenshia aliba tesem ka nung tanur anati bomb bener arua pokdaktsüba lendong nung nisung 9 tepset.
You must be logged in to post a comment Login