Mitsubishi Electric-i spoken word display technology porateta yangluogo

Tokyo, February 23 (Agencies): Japan nung tentetba telok kati tablet mesüra smartphone amshir kati pa temeyong phone screen nung nemetba ajanga screen nung tebangi jembiba o tezüluba kümdaktsütsü technology tasen ka alima nung tan mezüngsüa porateta yangluba osang ka metetdaktsüogo.
“Mitsubishi Electric teloki touch-technology aser voice recognition technology na loktepa amshiba ajanga tenarongi junga mangashir aser o junga mejembitetter nisungtem yaritsüsa tan technology tasen yanglutetogo,” ta EFE osangi tanü, Mongolbar nü metetdaktsü.
Android platforms nung amshitetba technology tasenba amshir kati o jembidang pa teka phone screen nung mapang tatsüka atema nemeta ataba sülen temeyongji achiji mesüra abelen leni atsür aotsüla aser phone nung temeyong nemetba nisungbai jembizüka yokba o ji pa temeyong sülen anidaka screen nung tezüluba kümer adoktsü.
Ano, phone amshisangi pa temeyong screen nung anaben tashi nemoktsüra, tezülubaji Japanese, English, Spanish, Chinese, Korean, German, Swedish, French, Italian aser Polish densema, alima oshi 10 nung melenzüka züngtettsü.
“Tan technology tasen porateta yangluba ajanga tenarongi junga mangashir nisungtem dang masü saka bendanglen senzür raliwalirtemi tajangzük tulu angutsü imlar,” ta Mitsubishi teloki metetdaktsü.
Kaketrejutem densema, tentetba balala den amalitepa tendangba sülen iba technology ya alima dang sayatsü sentong renema lir.
Ajisüaka, Mitsubishi teloki iba technology tasenba ya alima dang kodang sayatsü iba osangbo tanü tashi metetdakja mali.
Angazükba agi, iba technology ya 2017 küm March ita 31 nü tashi nung tatemküma tendangba sülen kasaji alima dang tapet mapang ka nung sayatsü asoshi par teloki renema lir.