Mizo aser asen arogo

India tatar hoho Rajya sabha nung Citizenship (Amendment) Bill (CAB) magizükdaktsütsü asoshi Mizoram nungbo arogotem ajak nung telok sarasadem ayongzüka agibaji asenok Nagaland nung Khristan-tem asoshia tebilemdangtsü aser tangazüktsü lesson ka asütsü. Atangji, Nagaland nunga kasa tebilemtsü onük nung Goanboratemi yashi state ajunga nung mokdangba sentong ayongzüka mongogo. Ibajia kodanga matalokdangba aser meimlaba mapa ka liasü, kechiyong tang tashi nung Nagaland nung tebilemtsü onük balala nung telok balalai mokdangba sentong ayongzüka agiaka, Goanboratemi mokdangbabo majurudang asen mangashidang. Joko, Goanboratemi tashi mokdangba sentong ayongzükbajibo onük tulu asütsü, anungji governmenti kanga süokia ia agitsüla. Atangji, asenok asoshibo CAB onük ya arogo nungertemi jembitsüba onük masü ta bilemtsüa akok, ibayongji arogo nung sarasademtsübajibo yutsür tejembia mejembir. Ajisüaka, jungjunga bilemdangra CAB onük ya tamangba yimsü dak rangloker inyakba mapa ka lir. Iba onük nung shia aliba agi, India den kidanger Muslim nunger lima Bangladesh, Pakistan aser Afghanistan limatem nung Muslim nunger masüba agi Muslim nungertemi reshikangshi marem India nung aruagi jenoka alir Hindu, Khristan aser Sikh amala yimsü amangertem nem India senso agütsüner. Iba onük nung shia alibaji jungjunga bilemdangra, India senso temeten agütsütsübaji Hindu nunger nem dang masü saka Khristan-tem nema kasa temeten agütsütsü shia lir, anungji Mizo aser Naga nunger Khristantem-ibo, shitakba agibo,  iba CAB onük ya Lok sabha nung agizükba ama Rajya sabha nunga agizükdakjang ta sarasademtsüla. Ajisüaka, Mizo Khristantemibo CAB onük ya Rajya sabha nung tagizükdaktsü ta sarasademba nungji asenok asoshi tangatettsü aser teinyaktsü tuluka sayur. Center sorkaria shitakba bendang lima nung tamangba yimsü ka amangba ajanga reshikangshiba metizüktet India nung arua alirtem nem senso temeten agütsüdi süra, Muslim aser Hindu aser tanga yimsü amangertem ajak nem kasa yimli aser maongka agütsütsüla. Ajisüaka, Muslim  toktsür tanga yimsü dak amangertem asoshiang senso akümtsü maongka aser temeten agütsüba nungji, Hindu nunger alima balala nung timtema alirtemji India nung anidener ta sayuner. India asoshi shisabolutsü kaji nütsüng renlokba ya lir, anungji India nungbo kibong ka nung teimba agia tanur anadang asotsü sentong yur inyaker. Ajisüaka, Muslim nunger nütsüng renlokba ya reprangdangra kanga agia tekaraba aser teimba sükdangtetter, anungji ibai mazüokra küm ishika tsüngda India nung Muslim nunger nütsüng teimba asütsü. Khen nung Muslim nunger nütsüng züinbaji tebur kati tetsür pezü pongo tashi agir tanur sojen sodaktsüba aser ano Bangladesh nungi arur Muslim nungertem menokdangtetba mapartem agi asütsü. Ibayongji, India nung Hindu nungertem balaka shisabolur. Ajisüaka, India nung Muslim nunger nütsüng züinba akoktsü asoshi Khristan agi anar kidanger limatem nungi Hindu nungertem anidentsü merangra, ibaji India asoshi tebilemtsü bendenloker asütsü. Ibayongji, All Assam Students’ Union-i dena magizüker. India tesem aika nung Khristan-tem reshikangshir, techinütsü mechidaktsür aser tenla ki raksatsür. Ibajiang center sorkari reprangtsüla. Ajisüaka, India nungbo Khristan-tem reshikangshir saka kidanger limatem nungi aruba Khristantem nembo senso agütsüdi ta asübajibo anemsü o lir. Ibaji menja aponger atsükshishiba otsü amai asütsü. Ibaji angatetba agi, Mizo nunger tamangertemi tenla kidang lokti sarasadem ayongzüka sarasadem südi. Iba ama sarasademji amangba purtem asoshi tashi aser ain angudak lir. Parnok denji asenok Nagaland nung aliba amangba purtem tamang nung tashi aser tasü aitba medemdangra, temekok tashia matutsü. Mizo nunger amangba purtem amaji, Nagaland nunga arogo lenirtemia nüngsen, tetsübu aser rongsen tsütsü takoksa arema alima yimten tashi anema odiodia jembitsüla aser sarasademtsüla.