Mizo NGO temi Amit Shah den ajuruteptsü

Guwahati, October 4 (Agencies): Mizoram nung Mizo NGO coordination committee-i union home minister Amit Shah-i state semdangdang lungkak aitsüba sentong yanglua aliba agienogo.
“Onoki pa nem memorandum ka agütsütsü aser Centre-i Citizenship Act, 1955 yanglushitsü merangba magizüker ta ashitsü” ta NGO Coordination Committee lennir kati ashi.
Amit Shah-i tang mezüng atema state semdangdang lungkak maittsüla ta Chief Minister Zoramthanga-i parnok ayongzükba sülen telemtetba melenshi, ta paisa ashi.
Zoramthanga ya Mizo National Front president lir aser NDA o North East Democratic Alliance (NEDA) nung MNF dena lir.
Külen, BJP Mizoram unit president John V Hluna-ia civil society teloktem dang Shah’-i semdangba mapang lungkak aitba sentong kecha mayongzüktsü atema mepishia liasü.
Honibarnü Amit Shah-i Aizawl nung party züngsemtem den ajuruteptsü aser telok dak sendakba onük aika lemsateptsü.
“October 5 nü Union Home Minister Amit Shah-i Aizawl semdangtsü. Iba mapang Mizo NGO Coordination Committee-i pa pelaa agizüktsü aser memorandum ka agütsütsü. Mizoram nung alirtem pa arutsübaji kanga yongya atar” ta Assam finance minister Himanta Sarma-i Twitter nung metetdaktsü.
Mizo Coordination Committee-i September 29 nü Shah-i state semdangdang sü tanak abener lungkak aittsü telemtetbaji agia liasü.
Centre-i Citizenship (Amendment) Bill benoktsü ta asüba anema parnoki Amit Shah anema lungkak aittsü telemtetba ka agia liasü.
BJP osang ka ajanga ashiba agi Shah-i mezüng Northeast Handloom and Handicraft Exhibition lapoktsütsü aser chief minister den tongti sorkar ketdangsertem den senden ka amentsü.