Mizo nunger election

Kasa Election Commission of India ajanga agiba election-sa süaka Nagaland nung agiba election o Mizoram nung agiba election na kenyongi balala lir. Atangji, Nagaland ama Mizoram-a Khristan teimba ser aliba Khristan state ka lir. Item Mizo Khristan-tem jagi election nung tim masüba mapa inyakbatem anema ola kanga sashia adoker aser pei vote peisasa ochishia enoktsür. Mizoram election nung candidate ka asoshi Election Commission ajanga latettsüba sen lakh metsüjia inra, kechiyong meindokmar. Ibaji dang masü saka tenükshitsü kaji, Mizo Khristan-temibo senyong pei vote mayokba dang masü saka tangar melen proxy vote enoktsütsüa memetet. Onsara süngjem nungji, election agiba anogo nung vote enoktsüdak police nüngdak madoker. Iba ama election ka agiba sülen tang Mizo  National Front (MNF) teloki zübazübaa government kümtettsüsa takok nguogo. Atangji, yimsü tesüdak Congress telokia kanga meranga toktepogo aser BJP telokia kechisüdir süaka Mizoram nung government akümtsü asoshi kanga meranga inyakogo. Ajisüaka, tang state nung yimsü tesüdak Congress aser center nung yimsü tesüdak BJP teloktemi takok mangutsüsa Mizo nungertemi election agitetbaji pei tangatetba nung nisung aikati timtem agia election mapa inyakogo ta angatetter. Kasa Khristan purtemsa süaka asenok Nagaland nung aliba Khristan-temi election mapang inyakba mapatem den Mizoram nung aliba Khristanpurtemi inyakba mapatem medemdangra, taaktsüka, am züdoka ittepa lir. Nagaland nungbo Khristan purtemi election tememen anema ola adoktsübaji pei akoksatsüsa mapa tamajung inyaker amai bilemer. Asenok lima nungbo arogo tenzükertemi anir candidate dang vote ayoker aser election agiba mapang tangar tenüng nung proxy vote enoktsütsü marendaker. Mizoram nung candidate ka asoshi election mapang nüngdak nung endoktsü asoshi latettsüba sen lakh metsüji onsara ta parnok rongnung jembir saka Nagaland election nungbo sen lakh metsüji telok tilaka nem agütsü nung tenük masünger. Nagaland Khristan o Mizoram Khristan na tamang aser tangatetba tetsüngdaji ibaji lir. Tan election nung takok anguba telok MNF teloki election mapang nübortem dang nangzükbatem rongnung tongtibang kaji Mizoram nung yi mayoktsü asoshi ano tanaben ozüng yanglutsübaji liasü. Atangji, tang tashi Nagaland nungbo yi ayoker mali saka tajemerbo sünga lir. Iba jagi küm ishika jakdang yi mayoktsü lemteta akaba to ayoktsüla ta ait nung alir yimsüsürtemi anir lokti tentet lenirtem aikati jembir. Ibaji shitak aküm nungbo ano Nagaland sünga yi ayokba dokan agi asüngtsü. Ibajiang Naga lanurtem asoshi tajungba asütsü asü mesüra tanga amai yi mayokang tajungba asütsüar, ibaji Naga Khristan-temi bendangtsüsa mapang ka arudagi. Mizoram nung MNF teloki nübortem dang inyaktsütsü nangzükbatem rongnung ano gari lenmang junga yanglutsütsü asoshia nangzüka lir. Vote asütsü atema sen agütsüba agi masü saka Mizoram ajungtsü asoshi mapa tajung inyaktsütsü nangzükba agi Mizo nungertemi MNF telok nem ano khen yimsüsütsü maongka agütsüogo. Atangji, Mizo nungertemi Congress yimsüsüba nung temulung machi aser BJP teloki jembiba nung temulung melemtep, anungji item teloktem jagi tamakok nguogo. Aji oda, Nagaland nunga election mapang yimten teloki nübortem asoshi tajung inyaktsütsü nangzükba agi yarir asü mesüra vote atema sen agütsüba agi yarir ta asenoksasa asenok dang asüngdanga telangzüba bushitsü kanga nüngdaka kümogo.  Atangji, asenok Naga Khristantembo election nung vote ayoktsübaji yimya ka dang amai kümogo aser tangar melen proxy vote enoktsütsübajibo tangari meinyaktetba mapa tajung tuluka amai jembir asünungji, tang tangbo asenok Naga nungertem yimten nung nüchiso akümtsü kanga saaka lir. Ajisüaka, asenoki asen lima meimra aser tanü majungyonga tarutsü lanu putubosa jungdaktsütsü bilemra, kechisüdirsüaka senyong vote ayokba aser proxy vote agütsüba mapatem yabo arogo nungertemibosa meinyaktsüla.