Mizo nunger telongjem

Kodangsa pei tetsü tasolima aser nübortem asoshi nüngdak adokdir, kecha kin kidong aser yimten telok indang mesüshii külemi longjemer takok ngua nokdaktetba kinji Mizo nunger ya ka asütsü. Aji oda, tanüa Mizoram nung election agitsü anogo ishika dang lia, Mizo nunger IAS ketdangser ka Election Commission of India ajanga tangaleni yokba anema Mizo nunger tetsür tebur ajak ka küma longjemer nokdakba ya asenok ajak asoshi tangazüktsü lesson tuluka asütsü. Mizoram lima ya akhidang Naga lima ama Assam state kübok dang liasü aser 1972 küm Union Territory aküm. Ajisüaka, ano aji agi temulung masü ser Mizo National Front teloki anir parnok yimten temeten asoshi telong nung lia raraba sülen 1986 küm India government den tangatettep ken o ka renem aser 1987 küm state kümadok. Iba anogo nung jagi Mizoram ya Northeast nung yimjung aser tesünep aliba state ta sükshia arur.Mizoram state kümer tang tashi nung MNF teloki anabenren yimsü asüba dak alaka, Congress teloki dang yimsü süa arudagi. Nagaland ama Mizoram-a Khristan kanga agia teimba ser aliba state ka lir. Iba state nung tang nütsüngyongsük ajak agi lakh terka shi lir aser item rongnung   87% bo Khristan lir. Iba ama state ka nung taoba election tashi nung BJP teloki shilem magitet saka tang election nungbo BJP telokiang government akümtsü meranger amai merangdagi. Iba ama tang yimsü tesüdak Congress telok anema BJP telokiang tashi itta tokteptsü amai apusoa alidang, ajungbena ka Mizoram Chief Electoral Officer, Shashank-i Election Commission dangi Mizoram nunger liso nisung, Principal Secretary, Home,  Lalnunmawia Chuaungo anema züluba ajanga pa state nungi agientsü ozüng agütsüba agi Mizo nungertem  mulungjang kanga yirudaktsüogo. Ibayongji, Mizo nungertemi Lalnunmawiaji masü saka Shashank-ang Mizoram nungi aotsü anogoang züngzüka tokja lir. Shashank ajanga Lalnunmawai tangaleni aotsüsa akümba kuliji, pai Mizoram nungi jena orr Tripura nung jenoka aliba Bru nungertem nem vote agütsütsü temeten songtemer ta CEO-i Election Commission dang metetdakja liasü. Bru nungertem ya 1995 küm Mizo nunger kaketshir aser lanurtemi parnok ya lisopurtem masü ta ser aridokba purtem lir. Iba mapang parnok Tripura nung oa jenok aser tang tashi Mizoram-i tanaben meyipa marutetter. Tripura nung parnok külem kin nisung lir saka parnok dangjibo Reang kin ta ajar. Item Bru nungertemi government den Mizoram-i meyipa aotsü lenmang lapokjang ta aiben  jembia arur saka marutetter aser yangji lia vote-a magütsütetter. Ajisüaka, taküm election nungbo Tripura nung jenoka aliba Bru nungertem nem Mizoram election nung vote agütsütsü asoshi Election Commission tebilemba liasü saka Mizoram governmenti memulung, iba jagi Principal Secretary-i Bru nungertemji vote magütsütettsüsa osang ka metetdaktsü. Iba osangji CEO-i metetdaktsüba ajanga Principal Secretary-baji Election Commission-i tangleni odaktsü. Tang Mizoram nung nübortem rongrongtsüsa tenzükba  onükji aji lir. Iba timtem matalokdanga, Mizo nunger mulungjang nung kodaser taküm election nungsa tanüker sepai kanga agia teimba yoker ta temulung melemi bilema liasü. Iba denji ano Khristan state ka nung BJP telok tashi itita tetsüng ajemokba agi Mizo nunger tamangertem mulungjanga mesüngjemteti liasü. Atangji, Election Commission-i Principal Secretary tangaleni yokba mapa anemaji Congress teloki dang masü saka BJP telokia mepelaba metetdaktsüogo aser paji moudaktsütsüla ta center government nem metetdaktsüogo. Iba ama Mioram nung Mizo nunger mulungba anema Election Commission-i inyakba anema mulungtet teloktemi dang masü saka government mapa nung inyakertem telongjem aser yimten telok ajak den ano osangbenertem telongjem dena longjemer nokdakba mapaji tenükshitsüka aser tashiji tulu lir. Pibo pei tetsü tasolima aser nübortem temeten kümzüktsü asoshi nüngdakba mapangbo yamajisa inyaker.