Mizo nungeri bendanger den kibalembu masütsü tuyur

Guwahati, September 4 (Agencies): Mizoram nung bendangertem arua timtemtsü tsübuba agi Mizo Zirlai Pawl (MZP)-i Mizo nunger dang non-Mizo nunger den kibong makümtsü tetuyuba agütsüogo.
MZP ya Mizoram nung kaketshir telok tongtiba lir aser parnoki lanurtem den non-Mizo nunger den kibong makümtsüba indang awareness campaign ka tenzükogo.
Mizoram ajungalen awareness campaign agitsü aser iba ya lisopur sobaliba, inyaksangshi aser tamangba yimsü kümzüka ayutsü atema inyaker, ta MZP tir L. Ramdinliana Renthlei-i ashi.
MZP-i lanurtem dang tanga state tem nungi lisopurtem aser talisa non-tribal nisungtem den kibong makümtsü ayongzüka iba campaign inyaker.
India Linük Temzüng nung Arrla 371G kübok Mizo nungeri maongka aika angur aser iba nung sobaliba ozüng aser inyakyim benshitsüba dena lir.
Iba Arrla ajanga bendangertem nem ali agütsütsü memelar aser Mizoram nung Mizo lisopurtemi dang ali alitsü aser ayoktsü melar.
Mizoram-i aoba non-Mizo nungeri mapang telatet ka atema inner-line permit (ILP) meshitsüla.
Lanur aika tangalen tazüngi aoer aser bendanger den kibalembur, iba jagi MZP-i iba campaign tenzüktsü lemtet ta osang angazüker.
MZP züngsemtemi Mizoram nung school aser college tem sema senzütsü.