Mizo sorkari HPC(D) den yimjung ken o junga akatsü imlar

Aizawl, October 16 (Agencies): Mizoram Home Minister, R Lalzirliana-i, tang Hmar People’s Convention (Democratic) den yimjung ken o tagidak junga akatsü imlar, koba ajanga state nung teti atema yimjung bener arutsü, ta ashi.
Honibarnü Lalzirliana-i, Mizoram sorkar aser HPC (D) nungi teshimtet telok na tsüngda tezüngzüktep atema framework renemogo, aser kasa onükji HPC(D) lenirtemia lemteptsü, ta metetdaktsü.
December ita tasembuba hopta nung state sorkar aser HPC(D) na tsüngda tasembuba senden amendang iba tezüngzüktep atema jembitsü.
Telok ana tsüngda mezüngbuba sendenji taküm August 10 nü amen aser tanabuba sendenji Aizawl nung October 5-6 anogotem nung mena liasü liasü.
2013 küm August ita nung state sorkar aser Hmar Mendenbuba, H Zosangbera-i aniba telok na tsüngda Suspension of Operations (SoO) atsülangshitsü onük nung mangatettep adokba ajanga senden junga metembang, iba sülen Hmar telok nungi lenir aika apu.
1994 küm Mizoram sorkar o HPC na tsüngda tezüngzüktep ka agiba sülen kobi melii Hmar telok ya tenteta liasü.