Mizoram aser Assam-i arrtsülen tensa meraksatsü lemtet

Aizawl, August 28 (Agencies): Bhairabi nung Mizoram aser Assam ketdangsertem tsüngda senden ka amenba sülen telok anapronglai inter-state arrtsü nung ashishitep aketba litsü nung tang aliba tensa meraksatsü ta telemtetba agiogo.
Iba senden nung Kolasib Deputy Commissioner Zoensanga-i anir Mizoram nungi teshimtet telok aser Hailakandi Deputy Commissioner Keerthi Jalli-i anir Assam nungi teshimtet telok aden.
Bhairabi anasa Zophai nung Assam nung alir kari mosque ka yangluba anema ken o benokba nung ajemdaker iba senden amen ta ketdangser kati ashi.
Taoba mapang Centre-i Mizoram aser Assam sorkartem dang arrtsü nung ashishitep aliba litsü nung tensa meraksatsü atema tetuyuba agüja lir.
Yaküm March ita Zophai nung Mizo Zirlai Pawl (MZP) ta ser Mizoram nung kaketshir telok tongtibai resting shed ka yanglutsü merangba ajanga tensa mejungi aküm.
Centre-i tang aliba tensa meraksaktsü shiaka Assam nung alirtemi mosque, dokantem aser ki tasentem yangluogo ta MZP-i tai tongloktsür.
August 8, 2019 nü Mizoram Chief Secretary Lalnunmawia Chuaungo lenisüba kübok arrtsü tebilemtsü indang core committee senden ka amen.
Idangji committee-i Mizoram Home department dang Assam nung alirtemi ozüng alema yangluba kiojentem agientsü atema tetuyuba agüja liasü.
Mizoram nung opposition tongti Zoram People’s Movement (ZPM)-i Mizoram sorkar aitsüogo.
ZPM züngsem kari Zophai semdang aser ashishitep aketba litsü nung Assam nung alirtemi mosque yangluba nguogo, ta ZPM-i ashi.
Mizoram aser Assam sorkar ketdangsertemi tesem semdangba mapang ka nung iba mosque ya yanglur, ta parnokisa ashi.
“Taküm March ita ZPM züngsem Lalsawivunga-i assembly nung asüngdangba ka langzüdang home minister Lalchamliana-i Assam den arrtsü atema mangatettep aliba kecha memetet ta langzüa liasü” ta ZPM-isa metetdaktsü.