Mizoram assembly election nung candidate 203 tokteptsü

Aizawl, Yimpoksüi (November) 12 (Agencies): Mizoram assembly menden 40 atema nisung 203-i nominations 212 tashi süogo. Iba election nung political party teneti tokteptsü.
Zoram Thar party, INC, Zoram People’s Movement, PRISM, Nationalist Congress Party aser National People’s Party nungi candidate temi constituency anana nung tokteptsü tenüng agüja lir.
Constituency ana nungi tokteptsü tenüng agütsürtem rongnung MPCC president Lal Thanhawla, ZPM chief ministerial candidate Lalduhoma, NCP president Lalawmpuia Chhangte, NPP state convener Lianzuala aser Zoramthar president Zaichhawna Hlawndo nungertem dena lir.
“Tanü AERO temi nomination paper tem repranger. Tashishitsü kecha melira aser November 14 tashi nung candidate temi tenüng meyipa magira, parnok ajak official candidates ta sangdongtsü” ta Mizoram nung Jt. CEO Zorammuana-i ashi.
INC aser MNF teloktemi constituency 40 prongla nungi tokteptsü tenüng agütsüogo, BJP-i menden 39 nung, Zoram People’s Movement-i menden 35, Zoram Thar party-i menden 24, PRISM-i menden 14, NPP-i menden 9 aser NCP-i menden 6 nung tokteptsü.
Mizoram kübok Hachhek constituency nung NGO coordination committee-i common candidate J Lalsailova toktepdaktsütsü shima lir. Bru nunger teimba sür aliba constituency nung Bru candidate shingaia tenüng magütsüba ajanga Lalsailova-i pa tenüng meyipa agitsü akok.
Taküm Mizoram assembly election atema tetsür 18-i tenüng agütsüogo aser iba ya Mizoram nung tetsür teimba toktepba election asütsü.
MNF president Zoramthanga aitsür
Maneni, Mizo National Front tanishir Zoramthanga-i Chakma tesemtem nung nüboyimba indang video ka social media nung prokshiba sülen nisungtemi pa aitsür.
NGO coordination committee-i Mizoram nung political party ajak dang assembly election nung Chakma candidate shinga metoktepdaktsütsü atema mepishia metetdaktsü. Ajisüaka, party tuluba ana- MNF aser Congress-i Chakma candidate tem shima lir.
“Bru nungertemi Mizoram toktsür aotsüba atema parnok sasa mulungtet. Parnok aiben meyipa anir arutsü merangaka, parnoki Mizoram aser centre atema khurettem ang talila bentsür arur. Ministry of home affairs-i sign süa aliba tenangzükba nung aliba ama inyaktsüla. Joko ojang dang asütsüla” ta taoba mapang coordination committee-i metetdaktsü.
Iba onük atema Congress-i ola madoker aser Chakma tesemtem nung nüboyimtsü atema party ketdangser shinga meyok. Ajisüaka, MNF President Zoramthanga-i par Chakma candidate tem atema nüboyimtsür.