Mizoram assembly election nung Congress & MNF tongti tokteptsü

Aizawl, Yimpoksüi (November) 26 (Agencies): November 28 nung Mizoram Assembly election mapang sorkar yimsü tesüdak Congress aser opposition MNF tsüngda tongti süa tokteptsü.
Telok ana den külemi BJP aser regional party asem- ZPM, NPP o PRISM teloktem lir.
Menden 40 atema BJP-i candidate teimba toktepdaktsür aser parnok candidate 39 lir. Maneni MNF aser Meghalaya nung amenoka aliba NPP telok anapronglai menden 40 nung tokteper.
Local party ZPM aser NGO nungi political party akümba People’s Representation for Identity and Status of Mizoram (PRISM)-ia election nung tokteper. ZPM-i candidate 32 aser PRISM-i 14 toktepdaktsür.
Taoba IPS officer aser taoba Prime Minister Indira Gandhi atema security in-charge ZPM President Lalduhoma aser Aizawl FC kibur Robert Romawia Royte naprongla taküm election nung tokteper.
Lalduhoma-1986 küm Congress toktsür Zoram Nationalist Party (ZNP) aküm aser ZPM nung par telok tashi taitba lir.
“Mizoram nung BJP aser NPP tera yanga mali. Parnok candidate kari danga takok ngura, ibaji nisungba dak aketba sempet aser tenüng ajanga anguba takok asütsü” ta Mizoram University nung political science professor kati ashi.
1987 nung state akümba sülen Mizoram nung sorkar akümtsüsa menden mongutetba election khen danga majurudang.
1987 nungi Congress-i küm 10 dak alaka sorkar yimsü süyonga arur aser tang mezüng atema tetsükdaktsü tulu ka ajurua lir. Taoba Home Minister R. Lalzirliana aser Speaker Hiphei na dena parnok tongti lennir 5-i party toktsüba ajanga iba tebilemtsü ajuru.
Tena den MLA asem- Lalrinliana Sailo, Buddha Dhan Chakma aser Hmingdailova Khiangte nungertemi party toktsüba sülen assembly nung Congress MLA 34 aliba nungi 29 dang kümogo.
Lalzirliana aser Sailo nati MNF nung aden aser külen Hiphei aser Chakma nati BJP nung aden. Khiangte-i independent ka ama tokteper.
Sikkim dak alaka Northeast state 6 nung parnok dena sorkar akümba ajanga BJP-i Mizoram nung Congress atsüngdoktsü meranger.
MNF ya BJP-i aniba North East Democratic Alliance (NEDA) nung dena lir saka Mizoram nung BJP aser MNF tsüngda pre-poll alliance kecha mali. Ajisüaka yimtenren nung mongin nisungtemi ashiba agi election temer MNF-i BJP den yariteptsü akok.
Meghalaya Chief Minister Conrad Sangma-i aniba NPP ajanga Mizoram nung lisopurtem aser Khristantem mesüzüktsü meranger.
“Onok ya lisopurtem atema inyakba telok ka lir aser northeast nung lisopurtem ola ka südaktsütsü atema meranger” ta Conrad-i election nüboyimba sentongtem nung jembia liasü.
“NPP, ZPM aser PRISM teloktemi sorkar akümba nung tongti shilem agitsü” ta political analyst aser social activist R. Sailo-i ashi.
Mizoram nung nütsüng yongsük 1,091,014 (2011 census) aliba nung Khristantem 87% lir aser 95% ji lisopurtem lir. Assembly menden 40 nungi 39 ji lisopurtem atema lemzükja lir.
Asüng agitsü aliba election atema candidate ajak agi 209 lir. Ibaji 2013 küm dang nungi candidate 67 agi teimba lir aser tetsür 15 dena lir.