Mizoram ‘bamboo State’ akümtsü: Dr. Jitendra Singh

Aizawl, November 23 (Agencies): Union Minister of State (Independent Charge) for Development of North Eastern Region (DoNER), MoS PMO, Personnel, Public Grievances, Pensions, Atomic Energy & Space, Dr Jitendra Singh-i, “Centre-i Mizoram state ya ‘Bamboo State of India’ küma renlokdaktsütsü asoshi mulunga lir,” ta Aizawl nung osangbenertem den jembiba mapang ashi.
Dr. Jitendra Singh-i, Mizoram nung aou aika moaja lir aser ibaji ajanga kidang nüngdakba oset yanglua amshiba kija masü saka paper yanglua India tesem ajaklen amshitettsü. Yamaji inyakba ajanga state rongsenkettsüng renlokba dang masü saka bendanglen alir linük lanurtem asoshi lenmang lapoktsütsü, ta ashi.
Iba dak sentakba nung pai, linük nung aliba “Bamboo Development Board” tashi itshidaktsütsü asoshi inyakyim tenzükogo, ta ashi.
Singh-i, tesüiba sorkartemi iba maparen nung Mizoram sentoka yutsüogo anungji tang Modi sorkari lapoktsüba sentong balala nung dena item maongka agitsüla, ta ayongzük.
Paisa, India nung cancer tashidak kanga buluba indang ashidang, iba tashidak ya Mizoram nung timba lir, anungji DoNER Ministry inyakyim kübok memenui Adyar Cancer Institute, Chennai aser ibala mesükba reju den lokteper state nung cancer anepaludak tesem lapoktsü, ta ashi.
Modi sorkari tenzüka aliba sentong balala nungi maongka agitsübaji tan November 26 nü agitsü aliba municipal election nung nüburtemi lennir shimba dak tuluka keta lir, ta pai shisem.
Kerala sülenbo Mizoram nung tazüng tashir noklang nung shilem 92 lir ta ashiba mapang, Dr, Jitendra Singh-i, “Mizoram nungi tazüng tashirtem aika linük nung aliba kanga dang nüngtugu college aser University tem nung inyakdar, ajisüaka state sorkari tangari züngshitsüsa kaketreju ka danga melapoktetba sasa bilemer,” ta shisem.