Mizoram CM tepsettsü amokmerenba atema tatok meshi

Aizawl, April 22 (Agencies) : Mizoram kübok Mission Vengthlang North nungi alir kati Facebook nung Chief Minister Lal Thanhawla aser pa kinungtsü Lal Riliani na tepsettsü jangrar ta metetdaktsüba sülen iba nisung jagi tanü tatok meshiogo.
Iba nisungji Thanhranga lir aser pai Facebook nung Mathana Pachuau ta tenüng amshir. Taoba Hombar aonung pai Facebook group – Zoram Politics Group nung Chief Minister tepsetnüba indang osang metetdaktsü.
Iba tasüngji pa apu aser Aizawl nung Chief Judicial Magistrate okadaki anir oa ken o benok. Okadaki pa anogo asemnü police ket nung ayutsü temelaba agüja liasü saka iba sülen pa psychiatrist ka dangi anir aotsü tetuyuba agütsü.
Tanü Mathana-i kasa Facebook group nung ashiba agi, “yi aser pa shisa matongba ajanga iba olen lemsatep.”
Tsüngrem tenüng nung chief minister aser pa kinungtsü nati pa nem tatok agüjang ta Mathana-isa metetdaktsü.
Paisa, police aser okadak dang pa tepuokdaki meyoki psychiatrist ka dangi anir aoba asoshi pelaba metetdaktsüogo.