Mizoram district ajak nung FCI godown yanglutsü

Aizawl, Rongjui (September) 3 (Agencies): Mizoram nung foodgrains zübazüba alemtsü atema district shia FCI godown ka ka yanglutsü ta Mizoram nungi Rajya Sabha MP Ronald Sapa Tlau-i ashi.
Aizawl nung aliba Aijal Club nung osangbener senden ka amendang Ronald Sapa Tlau-i “Mizoram nung connectivity timtem aser tzünglu kanga aruba ajanga stock point mesüra godowns nung chiyungtsü bendena ayutsübaji kanga tongtipang” ta ashi.
“Tang Mizoram nung FCI godown tulutibaji Tanhril godown lir aser iba nung jang aser tanga supply 5000 MT shi ayutsü akok. Sairang Dinthar nunga 10,000 MT yutetba ki ka yanglutsü sentong renemogo. FCI-i iba ki yanglutsü atema mulunga agizükogo aser Central PWD-i DPRs aser tanga nüngdaktem renemtsü” ta Ronald-isa ashi.
Tzüngluruwa Mizoram nung gari tulutem senzütsü kanga timtem ajurur. Meta talang pilar aliba district temi supply bener aotsü nung tetsükdaktsü ajurur saka FCI-i calendar tajung ka renemogo, ta Rajya Sabha MP-isa ashi.
FCI aser sendaktepa alirtem indang State Consultative Meeting nung Mizoram kübok district ajak nung godowns yanglutsü mulunga agizükogo, ta paisa shisem.
“Onoki mezüng Champhai district nung yanglutsü, Mizoram kübok district ajak nung tenemtiba nung alibaji iba district lir. Truck gari tulutem lenmang nung mesenzüteter aser iba jagi Champhai district nung stockpoint ka nüngdaker. Siaha nunga FCI godown mali aser state civil supply department den yaritepa godown tasen ka yanglutsü” ta paisa metetdaktsü.
Food Civil Supplies and Consumer Affairs department nung FCI mapa inyakertem aser Mizoram ketdangsertemi kanga dang meranga meta talangtiba pilar alidak alir nem-a foodgrains shitak agütsütsü atema mapa inyaka arur, ta Ronald-isa ashi.