Mizoram election atema Myanmar & Bangladesh arrtsü shibangogo

Aizawl, Yimpoksüi (November) 27 (Agencies): Congress-i sorkar yimsü asüba Mizoram nung Bodbarnü assembly election agitsü aser iba atema ketdangsertemi Myanmar aser Bangladesh den arrtsü shibangogo.
Mizoram Police ketdangser kati ashiba agi, central para-military aser state security forces nungi security personnel 11,100 tashi mapa lemzüktsüogo.
“Assembly election atema BSF aser Assam Rifles sepaitem dang Mizoram-i Bangladesh aser Myanmar den arrtsüa aliba tesemtem shibangtsü aser kanga junga mita anüktsü tetuyuba agütsüogo” ta Mizoram nung Joint Chief Electoral Officer Zorammuana-i ashi.
Election Commission-i tuyuba nung ajemdaker ketdangsertemi security force dang Mizoram-i Tripura, Assam aser Manipur den arrtsüa aliba tesemtem nung security akangshitsü shiogo. Election mapang inter-state borders nung nisung senzüsenbongba noktangtsü, ta paisa ashi.
Mizoram-i Bangladesh den kilometer 310 aser Myanmar den kilometer 510 arrtsüa lir. Border Security Force (BSF) sepaitemi Bangladesh arrsü aser Assam Rifles-i Myanmar arrtsü anüker.
Anepdang 7:00 ako nungi nikongtsütsü 4:00 ako tashi polling agitsü atema electoral officials 7,075 mapa lemzüktsüogo, ta Zorammuana-isa ashi.
Sepaitemi meina Election ketdangsertem ajak polling station 1,164 tongogo, ta Chief Electoral Officer Ashish Kundra-ia ashi.
Election Commission-isa Kanhmun nung special polling station 15 tashi lapoktsüogo. Iba yimtsüng ya Mizoram-Tripura arrtsü anasa lir aser Reang refugee tem vote agütsütsü atema lapoktsüba lir.
Mizoram nung all-women managed polling station 40 tashi lapokogo aser iba nung police aser security personnel dena polling staff ajak tetsürtem dang lir, ta CEO-isa ashi.
“Constituency 40 prongla nung EVMs (Electronic Voting Machines) den VVPAT (Voters Verifiable Paper Audit Trail) machines amshitsü” ta Kundra-i osangbener dang ashi.
Taküm assembly election nung candidate ajak agi 209 lir aser parnok rongnung tetsür 15 dena lir. Taoba mapang ama taküm-a tetsür voter teimba lir aser vote agütsür ajak agi 768,181 aliba nungi tetsür 393,685 aser tebur 374,496 lir.
Mizoram Assembly indang kümsük December 15 nü tembangtsü.
December 11 nü Madhya Pradesh, Rajasthan, Telangana aser Chattisgarh state tem den külemi Mizoram assembly election indang votes azüngtsü.