Mizoram election sülen Congress-mukt NE akümtsü

Guwahati, Monupii (May) 20 (Agencies): Mizoram assembly election sülen ‘Congress-mukt’ (Congress free) Northeast akümtsü ta Amungnü BJP national President Amit Shah-i ashi.
“Northeast nung onoki mezüng Assam nung takok angu, iba sülen Manipur aser Tripura nung angu. Nübortemi onok nem takok tulu ngudaktsü” ta Bharatiya Janata Party-i aniba North East Democratic Alliance (NEDA) indang tasembuba senden amendang Amit Shah-i ashi.
“Nagaland aser Meghalaya nunga BJP-i teyari agüja NEDA nung dena aliba teloktemi sorkar kümteta lir. Kobi melii Mizoram nunga election sülen ‘Congress mukt’ akümtsü” ta paisa ashi.
“Taküm küm tatemlen Mizoram nung election agitsü aser iba sülen northeast nungi chief minister tiprongla yangi külemi amentsü” ta BJP tirisa shisem.
Assam nung BJP takok tulu anguba sülen 2016 küm NEDA tentet aser iba ya yimten sabang ka dang masü saka northeast renlokdaktsütsü alizüng ayuba geo-political telok ka lir, ta paisa metetdaktsü.
“Taoba mapang northeast sorkartem nung ochimashi kanga inyak saka tang NEDA sorkartem kümteta aliba ajanga ochimashi politics toktsüogo aser terenlok bener arur” ta Amit Shah-isa ashi.
Northeast nung Congress sorkartem aija Amit-isa “Congress Chief Minister tem ajak Delhi, Mumbai, Bengaluru aser tanga yimtitem nung bungalow tem lir” ta ashi.
“Senji kong nungi aru ta süra, sensakertem yaritsü atema aruba sen nungi auyazükba liasü. BJP sorkari Centre nungi aruba sen poisa tashi nübortem ket atongtsü atema inyaker” ta paisa shisem.
Tanü senden nung northeast state tenet nungi Chief Minister, Deputy Chief Minister, MLA, MP aser NEDA nung dena alirtem aikati shilem agi.
Chief Minister tem rongnung Sarbananda Sonowal (Assam), Conrad Sangma (Meghalaya), Pema Khandu (Arunachal Pradesh), N. Biren Singh (Manipur) aser Neiphiu Rio (Nagaland), Biplab Kumar Deb (Tripura) aden.
Sikkim Chief Minister Pawan Kumar Chamling bo senden nung medentet.
Krishak Mukti Sangram Samiti (KMSS)-i tanü Citizenship (Amendment) Bill 2016 nema lungkak aitba sentong ka agidang Shah Assam-i aru.
KMSS lennirtem aser pusemertemi nübortem dang wako tanak asongtsü ayongzük aser parnokisa NEDA senden amendak Srimanta Sankardeva Kalakshetra anasa lungkak ait.
Tanü police-i KMSS tanishir Akhil Gogoi apu saka tatsüka lir chiok.
NEDA-i Guwahati nung regional office ka lapoktsü aser youth & women’s wing tentettsü sentong lir ta Amit Shah-isa metetdaktsü.
“Northeast nung lannurtemi NEDA dak teimla akar” ta paisa shisem.