Mizoram-i NEPD mapatong tenzüker

Aizawl (Mizoram), October 02 (Agencies): Mizoram sorkari state nung aluyimba ung ajemdaker rongsenkettsüng jenjang, yimtsüng terenlok aser nüburtem taküm jenjang tajungba akumtsü nükjidong nung New Economic Development Policy (NEDP) tenzükogo.
Honibar aonung Aizawl nung NEPD tenzükba sentong nung jembidang Chief Minister, Lal Thanhawla-i, iba mapatong tasenba ajanga aluyimba, horticulture aser tanga chiyongtsü züsentetbatem nung jenjang tajungba akümtsü atema private-public partnerships nung terenlok katsütsü, ta metetdaktsü.
“NEDP ya 2010 küm tenzükba state mapatong New Land Use Policy (NLUP) nungi tentet. Iba indang tongtibangtiba nükjidongji pei peri dang akaba jenjang nungi tangar danga ayoktsüsa rongsenren renlokdaktsütsü asoshi inyakba mapa ka asütsü,” ta Chief Minister-isa ashi.
Mizoram sorkari sen crore 2,873 indang NLUP ya kibong 125,000 nem senotsü teyari agütsütsü aser tekong lu ayimba toktsür aluyimba yimya melenshitsü atema training agütsütsü nükjidong nung tenzüka liasü.
Northeast nung nütsüng million 45.58 nungi shilem 27 bo tribal nisungtem lir aser parnoki tang tashi tekong-lu melentepa alu chia ayimer aser tesem kar nung aonsotsü balala, menti, kümpa aser tsük züsenteter.
Ketdangsertem sangdong ka ajanga ashiba agi, iba mapatong tasenba kübok NEDP  committee-i sentong 27 agizükogo aser ibaji taküm (2016-17) inyaktsü, aser item projects atema sen crore 250 lemzüktsüogo.