Mizoram kübok Lawngtlai district nung refugee tem tenüng züluoker

Aizawl, December 8 (Agencies): Mizoram kübok Lawngtlai district nung ketdangsertemi yimtsüng pezü nung Myanmar nunger senso 1,600 dak tema tenüng züluoktsü atema mapa tenzükogo.
“Lawngtlai district kübok yimtsüng pezü nung arua aliba Myanmar nunger 1,600 tashi jangjatsü atema tenüng züluok tenzükogo” ta Deputy Commissioner, Arun T-i osangbener dang ashi.
“Refugee temji district administration den züluokba sülen parnok nem temporary ration carda lema agütsütsü” ta paisa shisem.
Deputy Commissioner-isa ashiba agi, district administration-i refugee tem jungjunga mita reprangdar aser security maparen inyakogo.
“Rara anenba sülen parnok tanaben arrtsü adena parnok linüki meyipa odaktsünür” ta Arun-isa metetdaktsü.
Myanmar Army aser Arakan telungpurtem tsüngda rara tenzükba sülen taküm November 25 nü Myanmar nungi nisungtem Lawngtlai district nung arua jenok.
Refugee tem rongnung teimbaka tetsür aser tanurtem lir aser parnoki arrtsü adena arur Hmawngbuchhuah, Zochachhuah, Laitlang aser Dumzautlang yimtsüngtem nung jenok.
Myanmar kübok Mizoram anasa aliba Chin State nung Myanmarese Army-i Arakan telungpurtem anema mapa tesashi inyakba ajanga idakji alirtemi pei talidak toktsür arutsüsa aküm.
Mizoram kübok Hmawngbuchhuah, Zochachhuah, Laitlang aser Dumzautlang yimtsüngtem nung jenoka aliba nisungtemji Myanmar kübok Khumi aser Rakhine province nung alirtem lir. Parnok dang Mizoram nungeri ‘Zakhai’ ta ajar.