Mizoram & Myanmar arrtsü nung haats pezü lapoktsü

Aizawl, Luroi/August 21 (Agencies): Myanmar den arrtsü nung border haats lapoktsü asoshi India-i sentong yangludar.
Tripura aser Meghalaya nung Bangladesh den border haats kanga takok ngua aoba ajanga iba amala mesükba sentong yanglua aotsü asoshi ajungshir.
Centre aser Mizoram sorkar na tensendaktep nung local shishilembaba ajungkettsü aser arrtsü nung aliba nübutem nem mapa inyaktsü asoshi maongka agütsütsü nükjidong nung Myanmar den arrtsü nung ‘border haats’ pezü amenoktsü akok.
Mizoram sorkar source ka ajanga ashiba agi border haats atema southeastern Mizoram nung Hnahlan, Zote, Vaphai (Saikhumphai) aser Sangau (Pangkhua) tesem shimdanga lir.
Osang ajanga angazükba agi, Mizoram sorkari iba dak sendakba nung sentong tatongi yanglur temelaba agitsü atema Ministry of External Affairs (MEA) nem agütsüogo.
Temetettsükaji Mizoram sorkar aser Myanmar nungi ketdangsertemi tawa border haats amenoktsü atema tesem kar asadangogo.
Mizoram chief minister Zoramthanga-ia Independence Day nung o jembiba mapang ashiba agi, border haats lapoktsü atema benoka aliba ya India aser Myanmar na tsüngda shishilembadak tesem tongtibang ka asütsü.
Maneni South East Asian linük tem den Mizoram sendakteptsü atema shishilembaba lenmang koba Zokhawthar nung lir iba ya-a yakta ajungkettsü.
Kasa mapang nung Tlabung nung Trade Facilitation Centre renemogo aser Mizoram arrtsü nung Marpara, Tuipuibari, Silsuri aser Nunsury tesem nung Integrated Check Post (ICP) pezü amenoktsü atema benokdanga lir.
Ano Kawrpuichhuah nung ICP yakta tenzüka inyaktsü imlar, ta chief minister-i shiogo.
Mizoram aser Myanmar na arrtsü 404 km aser Bangladesh den arrtsü 318 km lir.
Bangladesh den arrtsü Border Security Force (BSF)-i nükdar aser Myanmar den arrtsü Assam Rifles sepaitemi nükdar.