Mizoram NGO temi Lok Sabha election nung shilem magitsü lemtet

Aizwal, Rongchii/April 2 (Agencies): Mizoram kübok NGO tongtibang CYMA, MUP, MHIP, MZP aser MSU densema NGO Co-Ordination Committee senden ka Hombarnü menogo aser parnoki taruba Lok Sabha election nung shilem magitsü atema telemtetba agiogo.
Parnokisa April 8 nü nungi tenzüka state ajunga mapang telatet ka makai mokdanga ayutsü ayongzükogo.
Tripura Transit camp tem nung aliba Bru nunger refugee tem vote agütsütsüba tesem dak sendakba ken o nung ajemdaker parnoki state mokdanga ayutsüba sentong ya ayongzükogo.
NGO Co-ordination Committee-i Tripura kübok Transit Camp tem nung alir Bru nungertem atema polling stations balaka metenteti pei tata polling station tem nung vote agütsüdaktsütsü asoshi akhanger.
2018 küm Mizoram State Assembly election mapang transit camp tem nung alirtem atema jenjang balaka agia Mizoram-Tripura arrtsü nung aliba Kanhmun yimtsüng nung vote agütsüdaktsü.
Kanhmun yimtsüng nung polling station 15 lapok aser Bru nunger ajak agi parnok 987-i vote agüja liasü.
Kasa mapang nung vote agütsütsüpur atema Tripura sorkari gari anepaluja liasü.
NGO temi commercial vehicles aser nija gari kiburtem dang election dak sendakba nung sorkar den teka amteper minyaktsü asoshi mepishiogo.
State ajunga mokdanga ayutsü atema telemtetba agiba dak sendakba nung CEO, Ashish Kundra-i ashiba agi, iba telemtetba ya kanga tia maka maparen ka lir.
CEO-i ashiba agi, election nung shilem magitsü atema telemtetba agibaji linük democray inyakyim anema lir aser iba ajanga shinga majangzüktsü.
CEO-isa, iba ken o ya pai ECI dang jenjang tapet agitsü asoshi abentsü, ta ashi.
Mizoram National People’s Party-i sangdong ka ajanga parnoki NGO Co-ordination Committee-i April 8 nü nungi tenzüka state ajunga mapang teletetka makai mokdanga ayutsü asoshi telemtetba agiba parnokia pusemer ta metetdaktsüogo.