Mizoram nung aliba Myanmar refugee tem meyipa mouner

Aizawl, Rongchii 06 (Agencies): Taoba küm pei kidang nungi atsüngtokba Myanmar nunger refugee 419 tang tashi Mizoram nung jenoka lir.
Osang ajanga ashiba agi, item refugee tem ya parnok yimtsüngi tanaben mouner aser rongrongshirong aser azüdokshi nung alitsü dang nungibo yimjung nungang liner, ta parnoki ashir. Item refugee tem ya Rohingya masü saka Mizoram nungi jakzükba lir.
Arakan Army temi Kaladan ayong nung mita atar Yimpoksüi (November) 25 nü Myanmar Army 11 taküm samatsüba sülen Paletwa nung tensa mejungi aküm aser iba sülen parnoki Mizoram arrtsü alema arua Myanmar nunger refugee 1,600 shi Lawngtlai district nung teyari agüja anenzükdaktsü. Iba sülen lendong tuluba adoka yimtsüng aika nung kongshi aser yimdaklir aika pei talidak toktsür aotsüsa aküm.
Item refugee tem ya Mizoram sorkari southern Mizoram nung Lawngtlai district kübok Zochachhuah, Laitlang, Dumzautlang aser Hmawngbuchhuah tesemtem nung aniden.
District ketdangsertem, Assam Rifles aser iba tesem nung aliba lokti tentet balala nungi Young Lai Association (YLA) aser Mizoram Baptist Church nungi lanurtem, Mizoram Thalai Kristian Pawl (MTKP) nungertemi parnok nem chiyongtsü aser abensüoshi agütsü.
Parnok chichiba kidangi moui yangi ang liner, ta Hmawngbuchhuah yimtsüng nungi osang ka ajanga ashi.
“Onoki rongrongshirong aser azüdokshi masü yimjung aginer. Maparen timi inyaktetra yangi Mizoram nung teti atema liner,” ta refugee temi Hmawngbuchhuah Village Council President dang ashi.
Iba yimtsüng nung khen atema yangluba ki 117 nung refugee 419 lir.
Paletwa ya Myanmar nung Rakhine state nung Rohingya nunger aliba tesem nungi northeast tsütsü lir, kong yimdaklirtemi yaria Arakan Rohingya Salvation Army (ARSA) temi Luroi (August) 25 nü police outpost amakba ajanga mitkartemi Rohingya nungertem aridok tenzük.
Arakan Army temi amokbanga aliba tesemtem nung sorkar anema mapa inyakba ajanga India atema tebilemtsü agütsü, kechiaser iba tesem nung sen crore aika jenjang Kaladan Multi Modal Project tenzüka lir.