Mizoram nung candidate takartibaji kanga tongmelang

Aizawl, Yimpoksüi 23 (Agencies): Mizoram indang assembly elections candidate rongnung pa ya takartiba aser pa ket nung sen cr. 55, football club ka aser luxury gari jenti lir. Ajisüaka, Mizo National Front (MNF) lennir Robert Romawia Royte-i ashiba agi, election nung tokteptsü asoshi maparen tem kanga tongmelang südaktsünüba ajanga nüboyim asoshi tetsüng agi dang senzür.
Mizoram state nung Aizawl East-II constituency nungi Royte ya opposition party candidate tongti ka lir, shibai tan assembly election nung mezüng shilem agitsü aser pai menden ka nungi tokteptsü kong yimsüsüa aliba Congress teloki lennir tejen aser teinyakdak aliba finance minister Lalsawta anioka lir.
2014 küm Lok Sabha polls nung independent candidate ka ama MNF lennir Royte-i toktepa liasü saka takok mangu.
Arishi küm 51 tain millionaire businessman aser 2017 küm I-League title angur Aizawl FC kibur Ryote-i ashiba agi, yimyim ayimba mesüra timtem kecha magütsüi “eco-friendly” nüboyim sentong nung anidaka inyaker.
40 member assembly atema representative tem shimtsü asoshi Yimpoksüi/November 28, 2018 nü Mizoram nung election agitsü. Iba sülen Luchii 11, 2018 nü counting agitsü.
Aizawl yimti nung Rasemnü/Wednesday anepdang 6:45 ako meta MNF telok kidang Ryote-i pa pusemertem den senden ka amen aser nüboyim sentong metenzükdang pai telok den sarasadem mapang ka agia liasü.
Nüboyim telok yagi visiting card ama card packet tilala bener ayazük kong Royte tenüng zülur liasü. Par telok yagi wako, poster mesüra loud speaker tem kecha mebenshidang tetsüng agi ki ka nung ki ka sema senzü.
“Ochi aser temürek yimya nung ni iba nüboyim sentong ya aginür. Nüburtem dang kü indang opponent indang tashimait kecha mejembitsü asoshi ni nüboyim len senzütem dang tekümdangtsü shiogo. Kija candidate anema masü saka onoki Congress party anema tokteptsü. Tanga party candidate tem den toktepbaji tajung masü,” ta Royte-i ashi.
2012 küm Lelte magazine-i Royte nem ‘Mizo of the Year’ title agüja liasü. Iba den külemi taoba küm Guwahati nung India Tatong Tir, Venkaiah Naidu-i Aizawl FC atema pa nem ‘Sports Club of the Year’ award agütsüogo.