Mizoram nung Citizenship Bill anema longkak ait

Aizawl, Aenjeti/January 23 (Agencies): Bodhbarnü Mizoram kübok tesem balala nung kaketshirtem densema nisung meyirejang aikati Citizenship (Amendment) Bill anema longkak aitogo.
Longkak aitertemi Ato Kilonser Narendra Modi aser Union Home Minister Rajnath Singh indang noksa rongja longkak ait. Mizoram kübok district headquarter tenet aser tanga tesem 50 dak tema nung Mongolbarnü longkak aitogo.
Longkak aitertemi placards bener yimyim ayima senzü aser PM Modi aser Home Minister Rajnath Singh mapa nungi anentsü asoshi khanga liasü. Parnoki ashiba agi, iba mepetmesü aket bill ajanga Mizo nunger tali majungtsü ta shia liasü.
Iba rally ya Mizo Zirlai Pawl (MZP)/Mizo students federation-i ayongzük. Parnoki January 8 nüa state ajunga ghonda 11 mokdanga liasü. MZP tiri ashiba agi, iba bill ya agizükra iba ajanga Mizo nunger samatsütsü.
Citizenship (Amendment) Bill koba January 8 nü Lok Sabha nung agizüka liasü, iba ajanga Bangladesh, Pakistan aser Afghanistan nungi Hindu, Jain, Khristan, Sikh, Buddhist aser Parsi nunger nem parnok ket nung kuli kaket kecha meliaka parnok nem India nung küm trok aliba sülenbo lisopur jenjang agütsütsü meranger.