Mizoram nung JE nokdangtsü mera agir

Aizawl, August 2 (Agencies) : Kidanger state Manipur nung Japanese encephalitis (JE) tashidak prokshiba osang angashia Mizoram sorkari iba tashidak nokdangtsü atema mera agidar, ta Mongulbarnü ketdangsertemi metetdaktsü.
“Health department nung ketdangser tejentem Hombarnü ajurutepa senden ka amenba mapang state rangben nung iba tashidak nokdaktsü atema mera agitsü lemtet,” ta health department nung ketdangser kati ashi.
Pai, iba inyakyim nung tenük yoka atatsü atema Aizawl Civil hospital lemzüktsüogo aser iba mozü kidang nüngdakba oset den mongintem anioktsüogo, ta ashi.
Iba tashidak yimya tali jangja metettsü atema mongin telok ka Manipur-i yokogo.
Paisa ashiba agi, merla entsü tepsetba mozü ki temeket aser kiset shiruru metsüba tesemtem nung rükogo.
Tang tashi nungbo Mizoram nung Japanese encephalitis tashidak nisung ka dak tanga puteta mali.
Japanese encephalitis tashidak agi Manipur nungbo taoba hopta nisung ana süogo aser nisung 25 tashi kasa tashidak agi shiranga mozü kidang yaridar.