Mizoram nung kibur mamenba dokan lir

August 01, 2016 : North East India tesemtem ya aikati kanga jangja memetet, kechiba süra item tesemtem sema jajatsü asoshi aiben mapang madoker aser maongka mangur. Mizoram state ta kodang südir aikati kilometre aika süngdong jenti aliba arem min tulu alitsü amai nüklar.
Iba state ya pa sasa tobur tajung tesem ka lir aser India nung aliba kin rongnung yangi aliba Mizo kin ya ochishir aser ajemalu agi sünga aliba nüburtem lir. Parnokia parnok dang ‘tlawmngaihna’ ta ajar. Iba tettetzü tangar dang aria bilemba, pei agitsü dang mebilemba aser ainer dang yarinüba lir.
Mizo nungeri tanga tesem nung maliba shishilembaba yimya ka tenteta lir aser iba shishilembadak tesem nung aliba dokan tem nung dokan amener mayur. Parnoki iba inyakyim dang ‘nghah lou dawr’ (shops without shopkeepers) ta ajar.
India tesem balala nung aliba dokan tulutem nung sen kanga junga shibanga ayur ajisüaka ‘nghah lou dawrs’ inyakyim nungbo dokan nung aruba sen shingaia manüker.
State yimtiba Aizawl nungi kilometre 65 shi pilar aliba Seling Highway nung item dokan aika angutsü. Item dokan tem nung süngjanglijang, naro aser aonsotsü tapu aika tayoktsü atema yua lir. Item oset indang jenjangji shiti pak nung zülur yuja lir aser oset alirtemi parnoki oset aliba alang sen inoka yutsütsü atema senpong yuja lir. Oda item dokan nung malibaji dokan nung amener ang mali.
Dokan atema asüba semtu tilala nung ya süngolemba aser süngjanglijang den ano ango, süngjang nungi agizükba tzü aser tzü nungi akitetben yua aliba amok angutsü. Dokan tem nung yuja aliba senpongtem nungji “Pawisa Bawm” mesüra “Pawisa Dahna” ta zülua lir. Oset alirtem ket nung sen tanük melira parnoki item senpong nungi pei sasa sen tanük agitettsü nokdanga mali.
Alima nung nündangba aika lir aser item dokan yagi onok kanga nungiter, ta parnoki ashir. Aluyimtsü kanga tasak anungji kibong nungi nisung ka anogo piyong dokan nüka amenbaji onsara takoksa tulu. Item dokan lapokertemi customer tem dak temulung alemer. Customer temi onok kodanga makoksadaktsür aser dokan nungi oset samaba otsü mali, ta parnoki ashi.