Mizoram nung maneni Congress-i sorkar akümtsü: Lal Thanhawla

Aizawl, May 12 (Agencies): 2018 state assembly elections nung Congress-i takok angutsü ta Mizoram Chief Minister, Lal Thanhawla-i Brihostibarnü metetdaktsü.
Congress Bhavan nung party züngsemtem den jembidang Lal Thanhawla-i, “Party shingaia kümsük asemben atongtepa sorkar ketdangsüa maru, saka 2018 elections sülen Congress-i ibaji atalokdaktsütsü,” ta ashi.
May 4 nü Mara Autonomous District Council election nung Congress-i takok tulu anguba ajanga ibaji jungkai adoka sayur, ta paisa shisem.
Menden 25 indang MADC elections nung Congress-i menden 17 nung takok angu aser opposition Mizo National front o Mara Democratic Front senteper menden 7 nungdang takok nguteta liasü. Menden ka nung Independent candidate-i takok angu.
Mizoram nung 1989 küm Lal Thanhawla-i taoba chief minister Laldenga-i aniba MNF madak takok angu aser külen 1993 nunga maneni takok angu.
1998 elections nung Zoramthanga-i anir MNF-i Congress madak takok angu aser parnokisa 2003 nunga takok angu, saka 2008 aser 2013 elections nung Congress-i dang takok ngua sorkar ketdangsüa arur.
2013 state assembly elections nungbo Congress-i menden 40 nungi 34 nung takok nguteta liasü.