Mizoram nung Manipur nungi aruba kiset shiruru nokdanger

Aizawl, August 1 (Agencies) : Mizoram nung Manipur nungi bener aruba kiset shirurutem nokdaktsü lemtetogo. Japanese encephalitis (JE) tashidak buluba osang angashiba sülen Mizorami Manipur, Churanchandpur district nungi nashi, napong, jang, an aser ak bener marutsü lemtet.
Japanese encephalitis ajanga Manipur nung nisung ana süogo.
Mizoram nung aliba mozükitem nung kanga kümdanga mitdar ajisüaka tang tashi nung iba tashidak agi shiranger ano ka danga meputet.
Osang ajanga ashiba agi, iba tensa den raratsü asoshi rapid action committee ka tenteta lir.
World Health Organisation (WHO)-i ashiba agi, Japanese encephalitis virus (JEV) ya flavivirus aser ibai dengue, yellow fever aser West Nile viruses mesüka lir. Iba tashidak ya merla ajanga prokshir.
JEV ajanga Asia linük aika nung viral encephalitis adokdaktsür. Küm shia nisung 68000 dak iba tashidak puteter. Kodang iba shirang agi tongdir mela mela süadoker. Iba tashidak ya Asia nung aliba yimtsüngtem nung kanga bulur.
Iba tashidak ya nisung o nisung nabo memenateper. Encephalitis tashidak yagi tekolok waklema aser tsüktsüka kümdaktsür. Iba yagi nisung ka tekolok tiyong nung timtem agütsür.
Iba tashidak ya tekolok nung bacteria aser viral infection asüba ajanga adoker.
India kübok Bihar, West Bengal, Assam aser Arunachal Pradesh state tem nung  Japanese encephalitis agi nisung aika süogo.

You must be logged in to post a comment Login