Mizoram nung okadak amakba atema bushisüngdangtsü

Aizawl, September 25 (Agencies): Mizoram kübok Lunglei jila nung taoba Brihostibarnü telok kati district court ki, office aser tanga kiojentem amakba tatalokba bushisüngdangtsü atema Mizoram Home Minister, R Lalzirliana-i tetuyuba agütsüogo.
Iba tatalokba nung aibelenertem ozüng tapet agi merenshitsü ta Lalzirliana-i osangbener dang ashi.
Mizoram nung ozüng amertemi teinyaktsü mapa meinyaktetba ajanga Lunglei nung ozüng alema mapa inyakertemi okadak aser office tem raksatsüba den külemi okadak ketdangsertem indang kiojen nung teka ai, ta Gauhati High Court Chief Justice Ajit Singh-i metetdakja liasü.
Hokolbarnü Chief Justice Ajit Singh-i Mizoram Chief Minister Lal Thanhawla dang shidi ka ajanga, iba tatalokba atema pa kanga aoksaba aser metetdaktsü.
Iba inyakyim ya administration mezüngmeshiba ka lir aser iba ajanga ozüng amertemi mapa shitak meinyakba jungkai adoka sayur, ta Chief Justice-i züluba shidi nung shia lir.
Iba tatalokba atema sorkari mapa meinyaki yutsüra, tarutsü nunga kasa tensa ajurutsü ana nung lir, ta paisa Mizoram chief minister dang ashi.
Iba tatalokba sülen Gauhati High Court-i Lunglei district nungi judge ajak anien aser parnok District and Sessions Judge,  Aizawl district nung mapa lemzükja liasü.
Lunglei jila kübok Zohnuai tesem nungi nisung telok kati lung aser lungro agi district court building tem amakba aser ano Civil Judge indang official residence amakba sülen Gauhati High Court-i judge tem anien.
August 27, 2016 nü Zohnuai nung alir C. Lalsawmliana tepsetba atema tai tonglokja alir Stephen Lalchawiliana tejak sayuang ta takhangba agüja Zohnuai nung alirtemi district court kima nung adenshir lungkak ait.
District Jail telung nung camp court ka ayongzüka agidang Stephen judicial custody nung ayutsü atema telemtetba agiogo ta iba mapang lungkak aitertemi osang angazükba sülen parnoki ozüng alema mapa inyaktsü tenzük.