Mizoram nung Parliamentary Secretary ajak anen

Aizawl, August 30 (Agencies): Bodbarnü Mizoram nung parliamentary secretary tenetpronglai parnok menden toktsüba shidi tem agütsüba Chief Minister Lal Thanhawla-i agizükogo.
Parliamentary secretary temji- K S Thanga, H Zothangliana, Lt Colonel Z S Zuala, K Lalrinthanga, T T Zothansanga, Hmingdailova Khiangte aser Joseph Lalhimpuia nungertem lir aser parnok Supreme Court-i July 26 nü oshidang agütsüba nung ajemdaker anentsü telemtetba agi.
Supreme Court nung Justice J Chelameswar, Justice R K Agrawal aser Justice A M Sapre nungertemi akümba bench-i The Assam Parliamentary Secretaries (Appointment, Salaries, Allowances and Miscellaneous Provisions) Act, 2004 ken o benoka angadangdang, Assam legislature-i parliamentary secretary menden adokdaktsütsü tashi mali, anungji Assam nung parliamentary secretary shimtsü ozüngi memelar, ta oshidang agütsü.
Lal Thanhawla ya Mizoram PCC tir lir aser pai taoba parliamentary secretary tem ajak general secretary inyaktsü shimogo.
Taoba parliamentary secretary temji MPCC general secretary tem ama shim aser ibaji sangküm state assembly elections atema party tashi aittsü nükjidong nung shimer, ta osang ka ajanga ashi.
Taoba minister tem aser MLA teinyakdak Lalrinliana Sailo aser Nihar Kanti Chakma naprongla general secretary inyaktsü shim.