Mizoram nung Scrub Typhus agi shiranger 161 kümogo

Aizwal, Aenjeti 22 (Agencies): Southern Mizoram, Lunglei district kübok Haulawng yimtsüng nung scrub typhus agi shiranger 161 kümogo, ta state health department ketdangsertemi metetdaktsü.
Integrated Disease Surveillance Programme, State nodal officer Dr Pachuau Lalmalswama-i ashiba agi, iba yimtsüng scrub typhus tashidak agi atongba ya Aenjeti tetenzüklen mezüng metetdakja liasü. Pai ashiba agi, Haulawng yimtsüng aser Lunglei district kübok kidanger yimtsüngtem nung scrub typhus tashidak agi nisung 161 shirangdar.
Ajisüaka nodal officer yagi ashiba agi, iba tashidak prokshia aotsü alibabo nokdangogo aser tashidak agi tonga alirtem nem medical treatment agütsüdar. Paisa ashiba agi, medical team ka Küptoknü Mausen yimtsüngi laboratory nung tendangtsüba atema samples tem tebeni ogo.
Lalmalsawma-i ashiba agi, scrub typhus tashisak agi shirangba osang yaküm küm Aizawl district kübok Phullen yimtsüng nungia angazükogo.
Scrub typhus ya mite-borne tashidak ka lir aser iba ya ‘Orientia tsutsugamushi’ ajanga tongdaktsür. Mites taini-ibo memteper aser larvne koba kanga dang tila lir aser tenük agi mangur iba ajanga kecha memeteti meteper. Iba tashidak agi shirangertem yimya agi, fever, primary lesion, anakra aser lymphadenopathy agi atonger.