Mizoram nung tanur 2500 dak tema school mazünger

Aizawl, Oct. 16 (Agencies) : Mizoram nung arishi küm 6 nung 14 tsüngda alir tanurtem parnok 2,665 tashi school mazünger, ta Brihostibar nü state school education minister H Rohluna-i Assembly nung metetdaktsüogo.
School mazüngertemji Lawngtlai district nungi timba lir. Yangji alir tanur 1,201 tashi school mazüngertem lir aser iba sülen Lunglei district nung tanur 580 shi kasa tia nung lir.
Ajisüaka Aizawl district nungbo tanur 67 ang school mazüngertem lir, ta Mizo National Front (MNF) nungi Lalrinawma-i asüngdangba ka tzüluba nung langzüba mapang H Rohluna-i ashi.
Pai ashiba agi, school education department-i SSA Mission kübok ‘Residential Special Training Centre’ aser ‘Non-Residential Special Training centre’ tem lapokogo aser ibaji ajanga item tanurtem nem tesayuba (non-formal education) agütsütettsü.
Education department nung ketdangsertemi, tsürabur kari parnok tamangba yimsü dak ajemdaker pei tanurtem school-i meyoker aser kanga mepishiaka parnoki amangba nung kanga tashi ita aliba ajanga nema malur, ta PTI dang ashi.