Mizoram nung temesepba mozü achir 1,500 dak tema süogo

Aizawl, Aenjeti/January 31 (Agencies): Mizoram nung 1984 nungi shir tanü tashi nung temesepba mozü achir tetsür 173 densema nisung 1,529 shii süogo, ta state Excise & Narcotics department osang ajanga metetdaktsü.
Temesepba mozü achiba ajanga asür nisung 1,529 nungi, nisung 190 shi heroin overdose ajanga asü aser tanüngbaji pharmacy nung anguba mozütem, talisa Spasmo-proxyvon aser Parvon spas tem ajanga asü.
State nung 2015 küm tashi SP aser Parvon spas ajanga mozü achir timbaka asü saka 2016 nungi shir küm 3 tsüngda tashi heroin mozü ajanga nisung timbaka südaktsüba asadangtetogo.
Kasa sangdong ajanga ashiba agi, Mizoram nung mozü achiba dak sendakba nung asür timtibaji 2004 küm liasü; iba kümji mozü achir 143 asü.
Taoba küm mozü achiba dak sendakba nung tetsür 10 densema nisung 56 asüba osang lir aser parnok rongnung heroin overdose ajanga asür nisung 17 shii liasü.
Taküm küm tenzüker January 30 tashi nung temesepba mozü achiba dak sendakba nung tetsür ka densema nisung pungu süogo.
2018 küm Mizoram nung temesepba mozü achiba dak sendakba nung bendanger nisung 29 densema nisung 2,327 shi apu. Kasa mapang Mizoram Liquor (Prohibition & Control) Act, 2014 kübok nisung 1,482 pua liasü. Iba denji külemi, Narcotics Drugs & Psychotropics Substance (ND&PS) Act, 1985 kübok nisung 662 aser Mizoram Excise Act, 1973 kübok nisung 154 shii pua liasü, ta osang nung shia lir.