Mizoram nung tetsütem shilem 92-i tanur nem HIV memenaloktsü

Aizawl, August 25 (Agencies): HIV aketer tanur tetsütemi asoba kinü tanur 437 rongnungi tanur 405 dakbo HIV maliasü, ta Prevention of Parents Child Transmission Centre-i metetdaktsü.
Iba osang ya 2011 küm nungi 2016 July ita tashi nung HIV aketer tanur tetsütem statistics nung lir, ta ketdangsertemi ashi.
Mashisa tetsütem ajakji Aizawl Civil Hospital nung tendang aser osang bendena liasü.
2005 küm hospital ka nung Prevention of Parents Child Transmission Centre amenoka liasü, kong mongintemi counseling agüja HIV aketer mashisa tetsütem anepalua liasü.
Kasa hospital nung Early Infant Diagnosis aser Multi-Drug Regiment treatment agüja liasü.
Early Infant Diagnosis service ya 2011 küm tenzük aser Kolkata nung aliba National Institute of Cholera & Enteric Diseases Laboratory nung kinü tanur 437 indang azü samples tendanga liasü.
Kinü tanur 437 rongnungi tanur 32 bo tetsütem dang nungi HIV menazüker liasü, ta ketdangsertemisa ashi.
Ajisüaka tanur ajak nem treatment agütsüdar aser anema dang lir, ta parnoki ashi.
2006 küm Aizawl Civil Hospital nung Anti-Retroviral Therapy Plus Centre amenoka liasü, kong tanur 187 densema HIV positive nisung 4,099 tenüng züluoka liasü.
2011 küm nungi Anti-Retroviral Therapy agir rongnung nisung 1,005 bo süogo.