Mizoram nung yi mayoktsü noktangba agien

Aizawl, January 30 (Agencies): Mizoram nung Mizo National Front (MNF)-i sorkar akümba sülen ‘dry day declaration’ sangdongba Gauhati High Court nung Aizawl Bench-i agienogo.
Iba ajanga Mizoram nung yi ayokertemi March 31, 2019 tashi dokan lapoktsü melar.
Chief Minister Zoramthanga-i anir MNF sorkar kümli, December 21, 2018 nungi January 14, 2019 tashi yi mayoktsü atema tenokdangba agütsü aser iba sülen parnokisa iba ozüng March 10 tashi alitsü latetshi.
Ajisüaka, sorkari ‘dry day declaration’ mapang atsülangba anema Mizoram Liquor Vendors Association aser bonded warehouse kibur 3-i ken o ka benok.
Parnoki sorkar tebilemba akhümtsübur saka mapa timi inyaktsü nüngdaker ta okadak ken o benokba nung shia liasü.
2018 Assembly Elections nung Mizo National Front (MNF)-i yi noktangtsü ta nangzüka liasü saka MNF sorkari ajungbena ‘dry days’ atsülangba ajanga yi ayokertem aser warehouse kiburtem takoksa kanga angur.
Warehouse kiburtem aser yi ayokertemi yi mayokba ajanga dang masü saka electric bills, mapa inyakertem itasen aser ki taa agütsüba ajanga takoksa kanga angur ta ashi.
Parnoki anogo nung sen lakh 4 shi ka akoksar, ta warehouse kibur kati osangbener dang ashi.
Parnoki March 2019 tashi permit meshia lir aser iba tashi jibo mapa inyakdaktsütsüla, ta paisa shisem.
“High Court-i tetuyuba agütsübaji warehouse kiburtem atema tepelatsü osang lir kechiyong kanga dang ajungbena ‘dry day’ sangdongba ajanga takoksa jenti angur” ta yi ayoker Francis Sailo-i ashi.
Taoba ita ishika parnok dangi yi supply-bo arur saka mayoker ta asüba agi yi aika bendena lir aser March 31, 2019 tashi nungbo meyokmatsü, ta yi ayokertem aser warehouse kiburtemisa ashi.