Mizoram nung ZNP-i BJP den tesentaktep pilar

Aizawl, July 8 (Agencies) : 2014 Lok Sabha election aser 2015 Aizawl Municipal Corporation (AMC) election atema BJP den külemi yariteper telok – Zoram Nationalist Party (ZNP)-i BJP den tesentaktep pilar ta tanü metetdaktsü.
Centre nung sorkar tashi aruba sülen küm ana lir BJP-i parnok miim tebilemba – ‘Hindutva’ mapa inyaktsü tenzük. Parnoki linük kübok tesem balala nung nashi tepsetba noktang aser Khristan tem indang tekülem kitem raksatsü tenzük, ta taoba Lok Sabha züngsem Lalduhawma-i anba ZNP-i metetdaktsü.
Shisaliok nung Hindu nunger tesayubatem enoksemba aser Mizoram nung Yoga Day alitsü tetuyuba agütsüba ajanga Mizoram nung arogo lennirtemi tentetba Mizoram Kohhran Hruaitute Committee (MKHC) shisabuludaktsü, ta ZNP sangdong nungsa shia lir.
Parnoki kanga dang junga shisadangba sülen BJP den tesentaktep pilatsü telemtetba agi aser maneni Mizo nunger sobaliba aser tamangba yimsü kümzüka ayutsü atema inyaktsü, ta ZNP-isa metetdaktsü.