Mizoram nungi osangbenertemi Kohima semdang

Kohima, February 01 (TYO): Mizoram state nungi journalists 10 den Information and Public Relations (IPR), Mizoram nungi ketdangser ana densema team kati anogo asemnü Nagaland state yimtiba, Kohima semdanga liasü, ta tanü Kohima Press Club tongti tezülur, Alice Yhoshü-i sangdong ka ajanga metetdaktsü.
February 1, 2019 nü DIPR Office, Kohima nung Mizoram nungi tesemdangertemi Kohima Press Club (KPC) züngsemtem aser Directorate of IPR Nagaland nung ketdangsertem den shisa lemsatepa liasü.
Shisalemsatepba sentong nung media tensa aser state ana nung journalists welfare atema kanga tongtibangsüa jembia liasü aser tesemdanger team-ia Nagaland nung parnoki ajangshibatem tongmelang agi lemsatepogo.
Mizoram nungi team ji Senior IPRO, Mizoram K Laldingliani leniba nung aru; nikongdang KPC-i tesemdangertem atema chiyung sentong ka ayongzüka liasü, ta kasa sangdong nungsa shia lir.