Mizoram ‘ODF state’ ta sangdongtsü

Aizawl, Aenjeti 22 (Agencies): Mizoram nung district 8 nungi district 6 bo Open Defecation Free (ODF) ta sangdongogo, aser taküm Metsüremi (March) ita nung ODF state ta sangdongtsü, ta tanü state ketdangsertem sangdong ka ajanga metetdaktsü.
Northeast India nung ODF state mezüngbubaji Sikkim (2008 küm) lir, iba sülen tanabuba ODF state ji Arunachal Pradesh akum.
Yaküm Nagaland Minister for Public Health Engineering Department (PHED) minister-i, 2018 küm Nagaland ya ODF state akumtsü, ta metetdakja liasü.
Tanü Mizoram yimtiba, Aizawl nung Union Minister of State for Drinking Water & Sanitation, Ramesh Chandappa Jigajinagi leniba nung National Rural Drinking Water Programme (NRDWP) aser Swachh Bharat Mission (G) review senden ka mena liasü, aser iba senden nung ketdangsertemi, state nung district 8 nungi district 4 ODF districts lir aser district 2 ‘self declared ODF’ ta metetdaktsü. Ano tanüngba district anaji taküm Metsüremi (March) ita tashi nung ODF districts akumtsü.
Senden nungsa ketdangsertemi, state nung nütsüng shilem 89.58% kidang metsümeshidak (latrines) lir, aser tang metsümeshidak 8137 teyangludak lir, ta metetdakja liasü.