Mizoram: PRISM aser regional party ana longjemogo

Aizawl, Rongjui/September 9 (Agencies): Tawa Mizoram nung kümtetba political party People’s Representation for Identity and Status of Mizoram (PRISM) puri Küptoknü taküm küm tatemlen agitsü aliba election dak sendakba nung regional party ana den longjemogo.
Tanga party ana ya Mizoram Chhantu Pawl (MCP) aser Save Mizoram Front and Operation Mizoram lir.
Küptoknü Aizawl kübok PRISM office nung osangbenertem den sensaksemba mapang Operation Mizoram convener, Vanlalhuma Kawlni-i, party asemi taruba election nung longjemer inyaktsü asoshi telemtetba agiogo, ta ashi.
Kawlni-i ashiba agi, parnoki sorkar kümtetra, state ya tribal tem aliba tesem ka ama kümzüka ayutsü asoshi state ajunga Sixth Schedule küboki anir aittsü.
Paisa, Sixth Schedule kübok state ajunga bener maitra yimden yimsüsüba aser lokti liba tsütsü nüburtem tekümzükba malitsü, ta ashi.
Parnoki Assam den mapang talangka arrtsü nung mangatettep aliba tongtibangsa inyaktsü, ta paisa nangzük.
Maneni pai, Union Home Ministry aser Assam sorkari 1933 küm sangdongba constitutional boundary ya magizükteter, ta ashi.
Kawlni-i ashiba agi, shidakba arrtsüji Bengal Eastern Frontier Regulation of 1873 kübok 1875 küm British nungeri Cachar district kübok Southern Frontier ya arrtsü asütsü ta sangdongbaji shidakba lir.
Inner Line Reserved Forest 1877 küm sangdongba nung arrtsü ya Lushai territory asütsü ta sangdonga lir, ta paisa shisem.
Anosa pai, party asem longjemer bendanglen nungi ozüng alema state-i arua alirtem anema jenjang tapet agia mindoktsü, ta ashi.