Mizoram PwD Commissioner agienogo

Aizawl, January 22 (Agencies): State nung kaketshirtem aser matamabensar lokti tentettemi lungkak aitba tashi mokoteti Mizoram sorkari tanü Hokolbarnü People with Disabilities (PwD), commissioner, B Sairengpuii mapa nungi agienogo.
Social Welfare Minister P C Lalthanliana-i, sorkari B Sairengpuii nem PwD Commissioner ka ama inyaktsü atema mapang atsülangtsüba agienogo, ta ashi.
Chief Minister Lal Thanhawla kinüngtsü Lal Riliani teno tanutsüla, Sairengpuii iba mapang nungi agienang ta lungkak aitba sentong anir Mizo Students Union (MSU) dang sorkari yokba shidiji Lalthanliana-i sayuogo.
Kaketshir meyirjang aika yimti nung aliba Vanapa Hall nung adenshi, aser B Sairengpuii agientsü osang tejangja angashir ang senshi. Ajisüaka mesenshi tsüngda parnoki temzüng asem lateta yur ang iba tesem toktsü.
PwD Commissioner mapa atema temsüa aliba nisung ka tangsa tang shimtsü, pa mapa nung shimba ozüngtem zülur agütsütsü aser yashi Brihostibarnü iba lungkak aita police den raradang yirur aliba kaketshirtem nem teyari agütsütsü renema yur senshi.
PwD Commissioner office jakdang lungkak aitertem police-i nokdangba mapang police trok dena tajemba agi nisung ti yiru.
Mizo Students’ Union (MSU), Aizawl City College Joint Students Union (ACCJSU) aser Mizoram Blind Society temi Sairengpuii nem iba mapa magütsütsü asoshi lungkak aita liasü.
Parnoki ashiba agi, secretariat service officer nungi anisüngzüker alila, Sairengpuii ya PwD Commissioner mapa atema shim ajisüaka la dak iba mapa inyaktsü asoshi tazüngba peria mali.