Mizoram: Rahul-i nüboyimba sentong nung shilema agitsü

New Delhi, Yimpoksüi/November 7 (Agencies): North-East nung Congress party pur kanga tashi ita aliba state tatembangbuba Mizoram nung taküm election agitsü lir aser iba atema nüboyimba sentong nung Congress tir Rahul Gandhi-i anogo ka shilem agitsü imlar.
Election atema nüboyimba sentong jangjaa alir party lenirtemi ashiba agi, Gandhi-i state semdangba mapang lokti senden ana nung shilema agitsü imlar. Congress lenir ya tang Madhya Pradesh, Rajasthan aser Chhattisgarh nung kanga mazüngi inyakdar aser iba mapang kasa nung Telangana nunga election agitsü lir.
2018 küm state pongu nung election agitsü aliba rongnung Mizoram nung dang Congress puri yimsü südar. Parnoki 2013 küm election nung menden 40 nungi 34 kokteta sorkar kümtetogo.
“Onok Congress tir office den sentong balala asoshi mapang aser anogo asatepdar. Pai anogo ka atema Mizoram semdangtsü akok aser tang tashi nungbo Yimpoksüi/Nov 20 nü lemteta lir. Tir-i state semdangba mapang Aizwal densema lokti senden ana nung shilem agitsü sentong yanglua lir, aser Aizwal dak alia tanga tesem ka nung pa nem shilem agidaktsütsü asoshi onoki ta sentong yangludar,” ta Mizoram election nüboyimba sentong nung shilem agir party lenir kari ashi.
Iba sentong ya mapa küma inyaka ora taoba election dang nungi balaka asütsü. Iba mapang nung Centre aser state nunga Congress puri yimsü süa liasü. 2013 election nungbo taoba Ato Kilonser Manmohan Singh, iba mapang nung party tir Sonia Gandhi aser Rahul Gandhi nungeri nüboyimba sentong nung shilem agia liasü.
“Onok Mizoram nung kanga tashi ita lir aser onoki tanaben sorkar kümtettsü temulung lema bilemer. State nung onok nüboyimba sentong tenzükogo. Maneni onoki Congress tir Gandhi nem nüboyimba sentong nung shilem agidaktsütsü asoshi sentong yangludar,” ta party lenir tanga kati ashi.
Taoba küm pezü tsüngda North-East nung Congress pur election ajak nung Bharatiya Janata Party (BJP)-i aniba National Democratic Alliance puri tsükdaktsüogo. BJP puri northeast nung regional party tem den longjemer sorkar kümteta arudar.
BJP tir Amit Shah-i Mizoram nung election atema nübo yimba sentong taoba ita Aizawl nung lokti senden ka nung shilem agia tenzükogo.
Mizoram nung election Yimpoksüi/Nov 28 nü agitsü aser tanga state tem den külemi Luchii/Dec 11 nü result sangdongtsü.