Mizoram rally atema Modi-i Garo nunger korang asemba aitsür

Aizawl, Yimpoksüi (November) 23 (Agencies): Hokolbarnü Lunglei nung Prime Minister Narendra Modi indang election rally atema advertisement nung Modi-i Meghalaya nung kin ka indang korang ka semer agiba noksa sayuba atema Northeast nung nisungtemi ashishiteper.
BJP-i Mizoram aser Meghalaya indang sobaliba mebendangtetba atema social media sabangtem nung nisungtemi parnok aitsür.
Modi-i Meghalaya nung Garo nunger korang semer agiba noksa sayua Congress nung national media head aser Mizoram campaign in-charge Szarita Laitphlang-i “Mizoram Campaign atema Narendra Modi-i Paila- Khasi korang ka semer agiba noksa atema sasa bilemtsür. BJP-i Mizoram nunger sobaliba akhümtsübur tabo jembir” ta Twitter nung metetdaktsü.
“Aamit Malvya (BJP indang national Information & Technology In-charge) aser par teloki Mizoram aser Meghalaya na sobaliba khenyongi balala asüba mebendangtetba atema sasatsür” ta laisa ashi.
Mizoram Congress-ia parnok indang Twitter handle nung “Asen Prime Minister-i North East nung sobaliba balala memetet. Kodaser iba ama nisung kati Mizoram nunger akhümtsübutsü imlar?” ta metetdaktsü.
Tanü Prime Minister Narendra Modi-i Congress aija jembi. “Congress-i Mizoram nung terenlok mapa meinyak aser Northeast nung lungkak aitba, prangpongtem aser mokdangbatem mali kümogo” ta pai ashi.
“Northeast nung mepetmesü, lungkak aitba aser mokdangbatem mali kümogo. Tanü ibaji nisung ajaki Itanagar nungi Aizawl, Kohima nungi Kamrup tashi ajangshir” ta Modi-i ashi.
“Northeast nung tesem aika nung nisungtemi kü nem sobaliba sübotsütem agütsür saka ibaji Congress lennirtemi purapuji ka ama züngshir. Parnok yangi arudang aika jembir saka chichiba nungbo yamaji lir. Congress party nung lennirtemi sobalibatem mezüngmeshiba angudang ni temulung züreper” ta paisa metetdaktsü.