Mizoram school kaket nung Anti-Tobacco lesson inoksemtsü

Aizawl, May 24 (Agencies): State nung moko tapu balala achiba nokdangtsü nükjidong nung Mizoram sorkari school syllabus nung anti-tobacco lesson inoksemtsü atema telemtetba agiogo.
New Economic Development Policy kübok Mizoram sorkari tanurtem anojungi moko aser temesepba mozü balala achiba nokdangtsü atema sangküm academic küm nungi upper primary schools tem syllabus nung anti-tobacco lesson inoksemtsü.
Osang ajanga ashiba agi, iba programme ya Aizawl district nung aliba middle school 50 nung tenzüktsü. Mizoram state nütsüng shilem 70-ibo cigarette aser biri achir aser shilem 90-i sada, zarda aser gutkha ama mokozü madokba mokotem achir.
State nung moko tali achiba ajanga India nung cancer tashidak tapu balala adokba temaba jenjang nung Mizoram lir.
Global Adult Tobacco Survey 2009-10 ajanga bushitetba agi, Mizoram nung moko achirtem rongnung tajemba agi shilem 9.3-ibo parnok arishi küm 15 majungdangyongi moko achi tenzüka liasü.
Küm ishika tejaklen Mizoram State Tobacco Control Society-i bushisüngdangba ka ajanga bushitetba agi, Mizoram nung high school kaketshir shilem 54-ibosa moko achir.