Mizoram sorkari HIV/AIDS anema raratsü atema NGOs, arogotem teyari meshir

Aizawl, November 15 (Agencies): Mizoram sorkari HIV/AIDS anema raratsü atema civil society teloktem, NGOs aser arogotem dang nungi teyari meshiogo.
Yashi Mizoram health minister Dr. R. Lalthangliana-i Young Mizo Association (YMA) nung central committee züngsemtem jaoka HIV kanga bulua adokba onük lemsateptsü atema senden ka amen.
Anogo asemnü tejaklen minister Lalthangliana-i Mizoram nung arogotem tentet- Mizoram Kohhran Hruaitute Committee (MKHC) lennirtem den senden ka amen.
NGO lennirtem den senden amendang pai Mizoram nung AIDS kanga bulua adokba tebilemtsü lemsatep.
“Mizoram ya health index nungbo record tajung lir, saka taoba küm ishika tsüngda HIV/AIDS kanga bulua adokba osang lir” ta Lalthangliana-i ashi.
“Anogoshia Mizoram nung nisung 9 dak HIV positive puteter” ta paisa National AIDS Control Organization-i osang agütsüba indang nenshia metetdaktsü.
“Onoki akokba tashi AIDS anema raraba nung sorkar den yariteptsü” ta Central YMA president Vanlalruata-i ashi.
Iba senden nung Mizoram Sate AIDS Control Society (MSACS) ketdangertem aden.
Khristantem teimba ser aliba Mizoram state-i Myanmar aser Bangladesh den arrtsüa lir. India nung HIV kanga adokba state tem rongnung Manipur aser Nagaland jakdang Mizoram lir.
Mizoram nung AIDS alir mezüng putetbaji October 1990 nung liasü aser iba sülen nungi AIDS ajanga nisung 2,000 jungnüa asüogo. Tang tashi nung Mizoram nung HIV aketer nisung 19,631 tashi puteta lir, ta MSACS project director Dr. Lalthlengliani-ia ashi.
October 11 nungi tenzüka Mizoram state sorkari Aizawl nung aliba sorkar office ajak nung AIDS indang sensitization programme agiyonga arur.