Mizoram sorkari HPC(D) den ken o jembi

Aizawl, October 05 (Agencies): Tanü Aizawl nung Mizoram sorkari Manipur nung amenoka aliba Hmar People’s Convention (Democratic) den tang agi tanabenbuba yimjung ken o jembiogo.
Iba senden nung adener sorkar ketdangser kati, sorkar aser HPC(D) napronglai telemtetba tajung ka dangi arutsü imlar, ta ashi.
Osangbener den jembidang State home department Additional Secretary, Lalbiakzama-i, “Onoki tongtibang onük aika jembiogo, talisa Sinlung Hills Development Council (SHDC) indang jembi,” ta metetdaktsü.
1994 küm state sorkar aser taoba mapang HPC telungpurtem na tsüngda tezüngzüktep ka agia SHDC ya tenteta liasü. Iba sülen iba tezüngzüktep agitsü memelungertemi HPC(D) ya tenteta liasü.
State sorkar tsütsü nungi züngsem pezüji -Lalbiakzama leniba nung Joint Secretary for home Lalhriatpuia, SP, CID (SB) Rodingliana Chawngthu aser OSD (Home) David H Lalthangliana nunger lir aser HPC(D) tsütsülen nungi Imphal nung amenoka aliba Arogo lenir Lalthalien leniba nung teshimtet telok ka lir.
Tamalen Lalthaliena-i, ken o jembibaji tongtibangsüa Hmar telungpur teloki tashi tuluba akhangba aser Sinlung Hills Development Council (SHDC) nem tashi tali agütsütsü onüktem asütsü ta metetdakja liasü.