Mizoram sorkari ita 8 tsüngda yi nung sen crore 19.44 sarutet

Aizawl, Oct. 17 (Agencies): January 16, 2015 nü state nung Mizoram Liquor Prohibition & Control (MLPC) Act, 2014 benokba sülen state sorkari ita 8 tsüngda yi ayokba nungi saru crore 19.44 nguogo, ta State Excise & Narcotics Minister, R Lalzirliana-i Hokolbar nü assembly nung metetdaktsü.
Mizo National Front (MNF) nungi MLA Dr K Beichhua aser Er Lalrinawma na densema MLA pezüi senteper asüngdangba ka langzüdang R Lalzirliana-i, MLPC Act kübok nisung 56,631 nem yi ayoktsü permit agütsü aser state nung aliba district pongu nung retail wine shop 22 liasü, ta ashi.
Lalzirliana-i ashiba agi, MLPC Act benokba sülen ita ti tsüngda (Jan. 16, 2015-Sep. 31, 2015) excise duty-i sen 19,44,69,543 sarutetogo. Ano March 2015 nungi yi ayoktsü permit agütsüba sülen sorkaria saru 24,82,83,107 sarutetogo.
MLPC Act anema inyakba atema ken o benokba mesüra temerenshi agütsüba nisung 1495 liasü aser nisung 507 dak temai parnok permit tim masüba nung amshi, ta Minister-isa ashi.
Paisa, taküm January ita nung MLPC Act benokba sülen yi branded ajemba ajanga nisung asüba osang mali, ta shisem.
“Yi meintoktetertem dang ang yi ayoker aser iba ya ajanga tanurtem aser tetsürtem mekongshi mesüra timtem mangu, saka yimjung nung aliba osang dang lir,” ta pai ashi.