Mizoram sorkari school agiba mapang melenshir

Aizawl, February 27 (Agencies): 2018 Assembly Election nung Mizo National Front (MNF)-i Mizoram nung school agiba mapang melenshitsü nangzükba ama tang Mizoram sorkari iba atema tetuyuba ka agütsüogo.
School education commissioner Esther Lalruatkimi-i ashiba agi, school mapang tasen melenshibaji primary school tem 9:00 nungi 2:00, middle school tem 9:00 nungi 3:00 aser secondary o higher secondary school tem 9:00 nungi 3:30 asütsü.
School timing meyipa reprangshitsü ta MNF-i nüboyimba sentongtem nung nangzükba ajanga parnoki vote aika angu.
“MNF party-i school agiba mapang meyipa reprangshitsü ta nangzükba atema onoki parnok nem vote agütsü” ta school tesayur kati ashi.
Taoba chief minister Lal Thanhawla’er sorkar mapang February 18, 2015 nü state ajungalen school mapang melenshitsü ta telemtetba ka agi.
Idangji sorkari private schools dena school ajak anepdang 9:00 nungi tenzüka aliba 8:00 ako nungi tenzüktsü lemtet.
Taoba education minister H Rohluna-i idangji “School mapang melenshibaji lokti taküm tajungba kümdaktsütsü atema lir” ta ashi.
Ajisüaka, school tesayur aikati mapang melenshiba ya magizük aser temang nung timtem adoker ta shia Congress sorkar aitsü.
“School agiba mapang melenshiba ajanga kaketshirtem temang nung shirang balala agi atonger aser talisa tepok nung timtem aika adoker” ta Home Mission School principal aser Mizoram Independent School Association president Lalthlamuana Hnamte-i ashi.
2015 küm school mapang melenshidang tang teinyakdak health Minister Dr R Lalthangliana aser Chief Minister Zoramthanga na dena MNF lennir aikati Congress party aitsü.
Aji agi yaküm assembly election mapang MNF-i yi ayokba noktangtsü aser school mapang melenshitsü nung ajemdaker nüboyimba mapa inyak.
“School mapang tasen melenshiba ajanga school tanur aika temang nung timtem adoker aser iba ajanga parnok lokti nunga timtem ajurur” ta taoba mapang Zoramthanga-i ashi.
Mizoram nung school mapang melenshibaji 2019-2020 academic session nungi tenzüktsü.