Mizoram tanaben ‘dry state’ aküm

Aizawl, May 28 (Agencies): Mizoram nung yi indang ozüng tasen ka yangluba sülen Mongulbar nungi ‘dry state’ ka akümba osang metetdaktsü.
“March 20 nü state Assembly nung Mizoram Liquor (Prohibition) Bill, 2019 agizük. Lok Sabha elections matongdang Governor Jagdish Mukhi-i iba Bill agizük. Iba Bill ajanga Mizoram Liquor (Prohibition and Control) Act, 2014 melenzüker” ta Excise & Narcotics minister K Beichhua-i tanü ashi.
Governor Mukhi-i agizükba sülen Bill nung lateta alibatem mapa küma inyaktettsüba liasü saka Lok Sabha o Assembly by-elections mapang atongba ajanga model code of conduct (MCC) tenzük, ta K Beichhua-isa metetdaktsü.
“Deobarnü Election Commission-i MCC agien. Iba sülen Mongulbar nungi Mizoram Liquor (Prohibition) Bill, 2019 mapa küma inyaktsü tenzük” ta paisa shisem.
Mizo National Front (MNF)-i Assembly elections matongdang nübor dang nangzükba ama iba mapa inyaker aser iba atema pelar, ta Beichhua-isa ashi.
Yi noktangba ajanga state sorkari küm nung Rs 60 nungi Rs 70 crore shi akoksatsü, ta paisa shisem.
Defence personnel aser temang anema alibaren asoshi nüngdakbapur dak alaka MNF sorkari state nung yi yangluba, bener aruba, ayokba aser ajemba ajak noktanger, ta paisa metetdaktsü.